O municipio de Castroverde gozou esta fin de semana de tres xornadas gastronómicas. A vila celebrou con éxito a segunda edición do seu concurso de tapas, que conseguiu aglutinar a un bo número de asistentes, entre veciños e visitantes, e que xa deu a coñecer ao local hostaleiro máis votado dos cinco que formaron parte do certame.
Finalmente, gañou Taberna Senador con Airiños do mar, que recibiu 903 puntos. En segundo lugar, quedou Roma coa tapa Coliseo e en terceiro, O Camiño que participaba con Antoxo do mar. O cuarto e quinto clasificados foron A Lenda con Éche o que hai e O Pendello de Moisés con As boas costumes.
Por outra banda, o resultado do sorteo ao azar entre o público consumidor tivo como primeiro premiado a Alejandro Gromaz, que leva un vale de compra por valor de 300 euros a utilizar en calquera establecemento comercial do municipio; a Natalia Graña e a Alejandro Castedo, que levaron un vale de 200 e 100 euros respectivamente.
