Os clubs e entidades deportivas da provincia teñen ata este venres -22 de marzo-, incluído, para solicitar as subvencións de concorrencia competitiva convocadas pola área de Deportes da Vicepresidencia da Deputación de Lugo, que contan cun orzamento total de 600.000 euros. Un investimento distribuído en dúas liñas:
– para actividade competitiva, con axudas entre os 500 e os 5.000 euros, que os clubs poden destinar a gastos en material deportivo, equipacións, transporte, fichas, arbitraxe, persoal ou alugueiro de instalacións, entre outros
– para a organización de eventos, con axudas entre os 500 e os 2.000 euros, destinadas a financiar gastos derivados desas actividades
O vicepresidente e deputado de Deportes Efrén Castro recordou así ás entidades a presentar a documentación, xa que esta se trata “dun recurso fundamental para o tecido deportivo, especialmente dos clubs de base e amador que facilitan o acceso ao deporte e promoven a actividade física en todo o territorio”. Ademais recordou que toda a información pode atoparse na web da área provincial: https://www.deputacionlugo.gal/temas/deportes/home
330 clubs de todas as comarcas recibiron a pasada anualidade estas axudas, en réxime de concorrencia competitiva, nas que se valoran criterios obxectivos vinculados ao rendemento deportivo (ascensos de categoría, resultados en campionatos estatais ou internacionais,..), a incidencia social do club (número de licenzas federativas e/ou equipos), o ámbito territorial, os anos de creación da entidade ou o persoal contratado, dacordo cos baremos establecidos nas bases da convocatoria, publicada no Boletín Oficial da Provincia o sábado 9 de marzo. Prímase, de forma transversal, aos clubs con equipos mixtos, femininos ou con persoas con capacidades diferentes.
