A Audiencia Provincial de Ourense ordena o arquivo da causa contra Jácome por presunta prevaricación
A Audiencia Provincial de Ourense ordena o arquivo da causa contra o alcalde por presunta prevaricación
O tribunal estima o recurso de apelación e conclúe que os feitos non son constitutivos de delito, ao considerar que se trataría, no seu caso, dunha posible irregularidade administrativa
A Audiencia Provincial de Ourense decretou o sobresemento da causa na que se investigaba o alcalde da cidade por un presunto delito continuado de prevaricación, relacionado coa falta de solicitude de compatibilidade entre o cargo de rexedor con dedicación exclusiva e o exercicio de actividades profesionais, entre elas a dirección dunha televisión local.
Deste xeito, o tribunal estima o recurso de apelación presentado pola defensa do alcalde e revoga o auto do 14 de abril de 2026 ditado pola praza 1 da Sección de Instrución do Tribunal de Instancia de Ourense, no que se daba por finalizada a investigación e se acordaba continuar coas dilixencias previas polos trámites do procedemento abreviado, ao considerar que os feitos poderían ser constitutivos dun delito recollido no artigo 404 do Código Penal.
Na súa resolución, a Sala analiza a xurisprudencia sobre a prevaricación omisiva e sinala que “non toda omisión ou incumprimento dun deber por parte dun funcionario pode catalogarse de prevaricación administrativa omisiva”, engadindo que non é “equivalente a unha resolución arbitraria expresa”. O tribunal tamén apunta que “non basta que unha resolución administrativa sexa contraria a Dereito para que constitúa o delito de prevaricación”.
A Audiencia considera ademais “cuestionable” a esixencia de declarar a compatibilidade no caso de que un membro dunha corporación con dedicación exclusiva desenvolva ocupacións remuneradas de carácter marxinal, cuestión que entende que podería corresponder á xurisdición contencioso-administrativa, á que non se acudiu.
O auto tamén recolle que a conduta investigada puido estar respaldada por informes técnicos e pola posición do Ministerio Fiscal, que tras abrir “dilixencias de investigación por idénticos feitos aos que agora nos ocupan”, concluíu o arquivo ao considerar que non existía infracción penal, senón unha posible irregularidade administrativa.
Os maxistrados destacan igualmente que “durante todo o tempo transcorrido desde que o alcalde exerce como tal, sendo ademais un feito notorio, en ningún momento consta efectuado reparo algún de legalidade por parte dos técnicos do Concello”. No seu auto, conclúen que, de existir algunha irregularidade, esta debería resolverse pola vía administrativa correspondente.
A resolución da Audiencia Provincial non é firme e pode ser recorrida mediante recurso de casación.