A CIG alerta da contratación de médicos sen especialidade nos PAC de Vigo e o BNG reclama reabrir as camas pechadas
A situación da sanidade pública na área de Vigo volve estar no foco das críticas por parte de organizacións da oposición e dos representantes dos traballadores. Por unha banda, a CIG-Saúde denuncia que a Xerencia da área sanitaria continúa contratando persoal médico sen a especialidade de Medicina Familiar e Comunitaria para prestar atención urxente nos Puntos de Atención Continuada (PAC). Pola outra, o BNG reclama á Xunta a reapertura inmediata das 180 camas hospitalarias que permanecen pechadas durante o verán ante a elevada presión asistencial.
A CIG-Saúde de Vigo asegura que xa advertira desta situación no mes de xullo e que solicitou á Xerencia garantías sobre a formación do persoal contratado. Hai dúas semanas, o sindicato pediu tamén información sobre as funcións que están a desempeñar estes facultativos, os centros nos que están a ser contratados e a base xurídica que lles permite realizar labores asistenciais. Segundo a central, a día de hoxe non recibiu resposta.
O sindicato considera especialmente preocupante que, lonxe de abandonar esta práctica, a Xerencia mantivese e mesmo incrementase a contratación de persoal médico sen MIR. A CIG-Saúde advirte de que o debate non se limita ás condicións laborais ou aos procesos de contratación, senón que afecta directamente ás garantías da atención sanitaria que reciben as persoas que acoden aos PAC, especialmente en situacións de urxencia.
Neste sentido, a central sindical lembra que a atención urxente require unha formación específica e que a especialidade de Medicina Familiar e Comunitaria é a esixida para prestar servizo nestes dispositivos. Os profesionais especializados completan catro anos de formación sanitaria especializada durante a residencia, período no que adquiren progresivamente competencias asistenciais e reciben formación en diferentes ámbitos, incluída a atención ás urxencias.
A CIG-Saúde defende así que non se debe equiparar automaticamente a formación universitaria en Medicina coa especialización adquirida durante a residencia e alerta de que o uso destes profesionais para determinadas funcións asistenciais podería incorrer en intrusismo profesional e repercutir na calidade da atención. Ao mesmo tempo, o sindicato sinala que o persoal sen especialidade podería desempeñar un papel útil en tarefas de desburocratización da Atención Primaria, contribuíndo a reducir a carga de traballo non asistencial que soportan os centros de saúde.
A central sindical responsabiliza directamente á Administración da situación por asignar funcións asistenciais a profesionais que non dispoñen da especialidade específica requirida e considera que esta práctica contribúe a desvalorizar a Medicina Familiar e Comunitaria. Por iso, reclama á Xerencia que contrate persoal coa titulación esixida e acusa o organismo de falta de transparencia pola ausencia de resposta ás informacións solicitadas.
O BNG pide reabrir as 180 camas hospitalarias
Á presión sobre a Atención Primaria e os PAC súmase a situación nos hospitais da área. O BNG de Vigo esixe á Xunta que reabra de inmediato as 180 camas hospitalarias pechadas durante o verán e que non agarde ata o 1 de outubro, data prevista para a súa recuperación.
O portavoz municipal nacionalista, Xabier P. Igrexas, considera “inaceptábel” manter pechadas estas camas nun contexto de elevada presión asistencial. Segundo denuncia, nos últimos días foi necesario desdobrar ata dez habitacións individuais no Hospital Álvaro Cunqueiro, mentres as Urxencias rexistran unha elevada afluencia, con medias diarias de arredor de 500 pacientes. A esta situación engade a sobrecarga do único PAC da cidade, situado na rúa Pizarro.
Para Igrexas, a situación responde ás decisións adoptadas polo Goberno galego na sanidade pública viguesa e evidencia a necesidade de recuperar de inmediato a totalidade dos recursos dispoñibles. O BNG reclama que a reapertura das camas se adiante para facilitar os ingresos e evitar novas demoras ou cancelacións de intervencións e tratamentos.
O portavoz nacionalista tamén alerta das dificultades que, segundo afirma, están a sufrir os usuarios nos centros de saúde, con esperas superiores aos 20 días e axendas sen citas dispoñibles durante as próximas semanas. Ao seu xuízo, estas demoras son consecuencia dun modelo que está a someter a Atención Primaria e os hospitais a unha presión crecente.
“As viguesas e vigueses non merecemos este castigo nin unha sanidade precarizada e lenta”, afirmou Igrexas, que reclamou á Xunta a reposición do persoal necesario e a recuperación dunha atención sanitaria pública “digna e de calidade”. O portavoz do BNG acusou o Goberno de Alfonso Rueda de aplicar políticas de recortes e privatizacións e reclamou un cambio nas prioridades da sanidade pública galega.