A Deputación de Pontevedra propón un pacto institucional para impulsar a recuperación do aeroporto de Peinador
A vicepresidenta da Deputación de Pontevedra, Luisa Sánchez, propuxo a Aena, á Xunta de Galicia e ao Concello de Vigo a creación dun pacto institucional para impulsar a recuperación do aeroporto de Peinador e reforzar a súa conectividade. A responsable provincial trasladou esta proposta a través dunha carta dirixida ao director de Datos e Mercado Aeronáutico de Aena, Ignacio Biosca; ao conselleiro de Presidencia, Xustiza e Deportes, Diego Calvo; e ao alcalde de Vigo, Abel Caballero.
Na misiva, Sánchez lembrou que a Deputación se incorporou ao Grupo de Traballo de Conectividade Aérea de Galicia por invitación de Aena e reiterou a disposición da institución provincial para colaborar activamente na mellora da operatividade do aeroporto vigués.
A vicepresidenta sinalou que os estudos elaborados por Aena constitúen un punto de partida para reverter a situación actual de Peinador e considerou necesario abrir novas vías de potenciación ante o que cualificou como unha política aeroportuaria descoordinada. Neste sentido, subliñou a importancia estratéxica da infraestrutura para os sectores turístico e empresarial, así como para a mobilidade da cidadanía da provincia.
Como medida de apoio, a Deputación xa anunciou unha achega de 200.000 euros para accións de promoción turística de Vigo e da provincia por cada nova ruta aérea que se implante en Peinador. Segundo explicou Sánchez, esta iniciativa pretende contribuír á captación de conexións e aumentar a competitividade do aeroporto.
A proposta de Pacto por Peinador busca afondar na colaboración entre as distintas administracións implicadas e avanzar nunha estratexia común para reforzar a conectividade aérea da área viguesa. Para iso, a vicepresidenta propuxo a celebración dunha reunión de traballo na que concretar posibles actuacións e fórmulas de cooperación destinadas a impulsar o desenvolvemento do aeroporto.