A Deputación impulsa unha frota de 80 vehículos eléctricos para conectar Ourense coa Ribeira Sacra
A Deputación de Ourense, en colaboración con AJE Ourense e Mobify, impulsa o proxecto EMICOU (Estratexia de Mobilidade Intelixente Conectada de Ourense), unha iniciativa que poñerá en funcionamento unha frota de 80 vehículos eléctricos para conectar de forma directa a estación do AVE de Ourense coa Ribeira Sacra ourensá.
O presidente provincial, Luis Menor, participou na presentación do proxecto xunto á vicepresidenta primeira da Deputación, Marta Nóvoa, nun acto celebrado na estación intermodal de Ourense no que tamén estiveron presentes a presidenta de AJE Ourense, Noelia Rodríguez, e a directora de operacións de Mobify, Nuria Iglesias.
Segundo explicou a Deputación, EMICOU pretende converterse nunha “solución integral” de mobilidade e responde ás liñas estratéxicas do desenvolvemento turístico provincial, baseadas nun turismo respectuoso co medio ambiente, non masivo e de máxima calidade.
Luis Menor destacou que a iniciativa permitirá avanzar cara a un modelo de mobilidade “zero emisións” e que supón unha aposta polo talento da provincia, xa que se trata dun proxecto que “se fai para Ourense desde Ourense”.
O presidente provincial sinalou que a proposta se enmarca nun contexto marcado polo freo á perda de poboación, o incremento da actividade turística e o proceso cara ao recoñecemento da Ribeira Sacra como Patrimonio da Humanidade da UNESCO neste ano 2026.
O servizo, denominado “Ribeira Sacra Conecta”, pretende resolver a falta de conexión existente para os visitantes que chegan á estación do AVE de Ourense e facilitar o acceso á Ribeira Sacra mediante unha frota intelixente de 80 vehículos eléctricos.
A xestión realizarase a través dunha plataforma multidispositivo que permitirá reservar, abrir e pechar os vehículos sen necesidade de chaves físicas. Ademais, contará con monitorización en tempo real e xeolocalización avanzada durante as 24 horas do día para optimizar rutas e reorganizar a frota mediante sistemas algorítmicos.
O deseño do proxecto contempla tamén unha integración estética respectuosa co contorno monumental e a instalación de puntos de entrega e recollida en localizacións optimizadas.
ESTUDO DUN CENTRO DE VISITANTES EN PEREIRO DE AGUIAR
Como actuación complementaria, a Deputación de Ourense estuda a creación dun gran centro de reunión de visitantes no concello do Pereiro de Aguiar, situado na entrada da Ribeira Sacra ourensá.
Este espazo tería como finalidade canalizar o tráfico particular e ordenar os accesos cara a transportes colectivos ou vehículos eléctricos autorizados, evitando posibles saturacións en zonas de especial valor ecolóxico.
A presidenta de AJE Ourense, Noelia Rodríguez, definiu o proxecto como unha iniciativa “ambiciosa” que pode contribuír á fixación de poboación, ao turismo de calidade e á creación de oportunidades para as persoas que viven no rural.
Rodríguez afirmou que EMICOU “pode transformar a maneira de moverse en Ourense” e destacou que “o futuro da provincia non se constrúe só na cidade, senón en cada recuncho do noso territorio”.
Pola súa banda, a directora de operacións de Mobify, Nuria Iglesias, explicou que o proxecto aborda a complexidade de conectar un territorio extenso e sinalou que EMICOU achega unha solución “clara, sostible e eficaz e a longo prazo”.
Luis Menor indicou que, aínda que o proxecto nace cunha orientación turística, poderá converterse nunha infraestrutura de uso durante todo o ano grazas ao tecido empresarial e emprendedor do rural.
Neste sentido, explicou que os profesionais locais poderán utilizar este servizo para desprazarse aos seus postos de traballo mediante unha fórmula de pago por uso que, segundo apuntou, será “o mellor aliado para reducir os seus custos”.
A Deputación sinala que este tipo de colaboracións público-privadas poden contribuír á creación de emprego local cualificado nos ámbitos da loxística, a tecnoloxía e o mantemento, xerando postos de traballo non deslocalizables e favorecendo a fixación de comunidade no rural.