Xustiza

O Ministerio Fiscal rexeita o indulto total pola gravidade dos feitos, pero aprecia razóns de xustiza e equidade que xustifican unha redución da pena

A Fiscalía informou favorablemente sobre a concesión dun indulto parcial ao maquinista condenado polo accidente ferroviario do Alvia, ocorrido o 24 de xullo de 2013 en Angrois. O Ministerio Fiscal considera que concorren unha serie de circunstancias que permiten entender que o cumprimento íntegro da pena resultaría desproporcionado.

O informe non cuestiona a sentenza firme nin a responsabilidade penal establecida polos tribunais e salienta a extraordinaria gravidade dos feitos, que provocaron 80 falecementos e 144 persoas lesionadas, con consecuencias tanto para as vítimas directas como indirectas.

Por este motivo, a Fiscalía descarta apoiar un indulto total, ao considerar que a gravidade obxectiva do accidente, a pluralidade de vítimas e o carácter irreversible das consecuencias desaconsellan unha remisión absoluta da pena. Con todo, aprecia razóns de xustiza e equidade que si xustifican informar favorablemente sobre unha redución parcial.

Entre as circunstancias tidas en conta figura o feito de que o condenado permanecese en todo momento a disposición da Xustiza e mantivese unha conduta procesual respectuosa coas resolucións xudiciais. Tamén se valora a súa adecuada integración social, familiar e laboral, así como o longo período transcorrido entre a data do accidente e a firmeza da condena.

A Fiscalía incorpora igualmente ao seu informe a posición manifestada por parte das vítimas e prexudicados, algunhas das cales expresaron a súa conformidade coa concesión da medida de graza. Aínda que esta posición non é vinculante, o Ministerio Fiscal considera que constitúe un elemento relevante no xuízo de equidade previsto pola Lei de Indulto.

O informe ten en conta tamén as circunstancias humanitarias e familiares acreditadas no expediente, entre elas as necesidades de asistencia e coidado dun familiar que precisa apoio continuado. Trátase, segundo a Fiscalía, dunha circunstancia que afecta unha terceira persoa especialmente vulnerable e allea aos feitos xulgados.

Así, o Ministerio Fiscal considera que o extraordinario tempo transcorrido desde o accidente, a conduta posterior do condenado, o seu arraigamento social e familiar, a situación asistencial acreditada e a posición favorable dunha parte dos prexudicados constitúen unha base obxectiva suficiente para considerar desproporcionado o cumprimento total da pena e apoiar unha redución parcial dos seus efectos.

A Fiscalía sinala que a medida podería concretarse na substitución da pena imposta por outra inferior, nos termos establecidos legalmente, para que posteriormente o tribunal sentenciador poida valorar a súa eventual suspensión conforme á lexislación penal.