A Movida Viguesa volve soar en Vigo cunha homenaxe a Golpes Bajos como un dos grandes momentos do Festival Son e Mar
A segunda semana do Festival Son e Mar Vigo 2026 chega cargada de propostas musicais e terá este sábado, 12 de setembro, unha das súas citas máis destacadas coa celebración de A Movida Viguesa, unha xornada dedicada á música e á cultura que marcaron a historia recente da cidade. Entre os momentos máis esperados estará a homenaxe a Golpes Bajos, que reunirá sobre o escenario a varios dos nomes máis representativos daquela xeración.
A vicepresidenta da Deputación de Pontevedra, Luisa Sánchez, e a delegada territorial da Xunta en Vigo, Ana Ortiz, presentaron este xoves no emblemático bar O Ovo do Casco Vello a programación da segunda semana do festival. No acto participaron tamén o promotor José Patiño e os músicos Teo Cardalda e Tony Lomba, que avanzaron algúns detalles da homenaxe á banda liderada polo falecido Germán Coppini.
Luisa Sánchez definiu a xornada do sábado como un evento dedicado “en exclusiva a Vigo, á cultura local e aos nosos músicos” e destacou a importancia dunha xeración de artistas que contribuíu a situar a cidade no mapa cultural e musical de España. “O 12 de setembro de 2026 quedará como a data na que a movida viguesa volveu soar en Vigo en directo, no mesmo día e no mesmo escenario”, sinalou.
O cartel reunirá formacións e artistas directamente vinculados coa movida viguesa, entre eles Golpes Bajos, Semen Up, Miguel Costas, Killer Barbies e Stoned at Pompeii. Para Sánchez, será unha “ocasión única” para recuperar cancións que marcaron unha época e volver vivir en directo a música que definiu boa parte da identidade cultural de Vigo nos anos oitenta e posteriores.
A homenaxe a Golpes Bajos será un dos principais reclamos da xornada. Teo Cardalda e Luis García, membros orixinais da formación, repasarán o repertorio da banda nun concerto no que participarán como artistas convidados Antón Reixa, Miguel Costas, Silvia Superstar, Alberto Comesaña, Mercedes Ferrer e Tony Lomba. O espectáculo servirá tamén para lembrar a figuras vinculadas á escena viguesa que xa non están, como Germán Coppini, Bibiano Morón ou Víctor Coyote.
Cardalda explicou que o concerto pretende servir para “acordarnos de Vigo” e dunha época “irrepetible”, reivindicando a vixencia das cancións daquela xeración. O músico asegurou que existe unha grande expectación ante o encontro e confiou en que o público vigués poida gozar do espectáculo.
Tony Lomba, pola súa banda, reivindicou o talento musical existente na cidade e asegurou que os artistas participantes están dispostos a “dalo todo” para converter o Peirao de Transatlánticos nun espazo de celebración e alegría.
Ana Ortiz destacou tamén o papel da movida viguesa como referente cultural e considerou que os artistas daquela xeración contribuíron a facer de Vigo unha referencia nacional da música e da cultura. “O sábado teremos a gran noite da Movida, cos grupos que levaron a Vigo a ser unha referencia nacional da música e a cultura, un lugar do que por desgraza estamos moi lonxe agora”, afirmou.
A delegada da Xunta subliñou que a Administración autonómica traballa para ampliar e diversificar a oferta cultural da cidade, desde a música clásica e o jazz ata a danza, o indie-pop ou o rock, co obxectivo de que Vigo “volva ao lugar que se merece” dentro da escena cultural nacional.
A organización tamén puxo en valor a resposta do público durante a primeira semana do festival. Segundo Ana Ortiz, os concertos iniciais reuniron máis de 10.000 persoas, cunha importante participación nos espectáculos de Cómplices, Amistades Peligrosas e La Unión. Sánchez asegurou que aquela resposta demostrou a emoción que segue xerando a música asociada a unha xeración que marcou a cidade.
A segunda semana do Son e Mar comezou este xoves, 10 de setembro, con Campus, unha proposta especialmente orientada ao público universitario. Este venres será a quenda de Lingua Urbana con HardGZ, o único evento de pago do ciclo e unha das citas que maior expectación está a xerar pola presenza dun dos principais referentes da música urbana galega.
O sábado chegará o prato forte coa xornada A Movida Viguesa, mentres que o festival botará o pano o domingo, 13 de setembro, con Orballo Cultural, dedicado á música galega contemporánea e de raíz. A programación desenvolverase no Peirao de Transatlánticos e o acceso aos concertos será gratuíto ata completar o aforo, agás a cita de HardGZ.
Con seis xornadas de música destinadas a públicos diversos, o Festival Son e Mar pretende pechar esta primeira edición cunha reivindicación da memoria musical de Vigo e, ao mesmo tempo, coa vontade de proxectar a cidade como escenario para a cultura galega e estatal.