A Panorama e un espectáculo de drons poñerán o broche final ás festas de Lugo
O San Froilán 2026 chegará este luns, 12 de outubro, á súa última xornada cunha programación que terá na música e no espectáculo aéreo dous dos seus principais atractivos. A orquestra Panorama será a encargada de poñer o broche final ás festas en San Fiz, mentres que ás 20.30 horas un espectáculo luminoso de drons ofrecerá unha proposta diferente para despedir esta edición.
A xornada comezará ás 11.00 horas coa Feira de Antigüidades e Coleccionismo na praza da Mosqueira e coa inauguración da Feira Medieval "Volta ao Medievo", na contorna da Catedral de Santa María. O recinto medieval permanecerá aberto ata as 22.00 horas e contará ao longo do día con actuacións musicais, desfiles, xogos e outras actividades.
A tradición tamén terá presenza cunha mostra de recuperación do oficio tradicional do fiado de la e liño a cargo de Bolboreta Fiandeira, que poderá visitarse ás 11.00 e ás 18.00 horas nos soportais da Casa do Concello.
O ambiente festivo continuará ao mediodía co pasarrúas de Os Picurruchos, que percorrerá a partir das 12.00 horas as rúas Progreso, Raíña, San Marcos, praza de Ferrol, Campo Castelo, San Pedro e Mártires de Carral. Ás 13.00 horas haberá ademais unha charanga pola praza da Soidade e a Rúa Nova.
A programación da tarde incluirá tamén a Gala Miss Deusa, organizada polo colectivo Alas ás 18.00 horas no patio do Edificio Administrativo do Concello. Os Picurruchos regresarán ás rúas ás 20.00 horas cun novo pasarrúas polo recinto histórico, a Rúa Nova e a Tinería.
Un dos momentos máis destacados da última xornada chegará ás 20.30 horas co espectáculo luminoso de drons en San Fiz. A exhibición aérea servirá como un dos grandes elementos visuais do peche dunhas festas que este ano substitúen os tradicionais fogos artificiais por esta proposta.
A música será protagonista ao longo de toda a xornada. Xisco Feijó actuará ás 21.00 horas na praza de Santa María, mentres que Los Diablos ofrecerán ás 21.30 horas o seu concerto na praza do Seminario.
A programación de orquestras comezará ao mediodía coa sesión vermú da Orquesta Escaparate, ás 13.00 horas na praza Maior. Xa pola tarde, ás 19.30 horas, será a quenda da Orquesta Costa Dorada, tamén na praza Maior.
O peche definitivo das festas chegará ás 21.30 horas en San Fiz coa actuación da orquestra Panorama, que poñerá música á última noite do San Froilán 2026 e despedirá unha programación que se estendeu durante máis dunha semana por distintos espazos da cidade.