A Real Academia Galega presentou en Vigo o documental dedicado a Begoña Caamaño polas Letras Galegas 2026
A Real Academia Galega presentou este luns na Escola Superior de Arte Dramática de Galicia, en Vigo, o documental Begoña Caamaño: navegar no pracer do azul, unha produción dedicada á autora homenaxeada no Día das Letras Galegas 2026.
O acto contou coa participación do presidente da RAG, Henrique Monteagudo; da irmá da escritora, Beatriz Caamaño; do director da ESADG, Daniel González Salgado; e do coordinador da colaboración da escola no proxecto, Roberto Pascual.
A proxección abriu a semana das Letras Galegas na cidade natal de Begoña Caamaño e reuniu participantes, alumnado e colaboradores dunha película que afonda na vida, na obra literaria e no pensamento da autora viguesa.
O documental combina entrevistas, material de arquivo e escenas dramatizadas inspiradas nas obras Circe ou o pracer do azul e Morgana en Esmelle, nas que participaron estudantes da ESAD Galicia. A produción tamén contou coa colaboración do alumnado e profesorado dos institutos Alexandre Bóveda e Castelao de Vigo.
Boa parte das localizacións escollidas para a gravación sitúanse en Vigo e na súa contorna, con espazos como a praia do Tombo do Gato ou a praia de Barra como escenarios destacados.
Durante a presentación, o público puido asistir á proxección nunha pantalla grande e participar posteriormente nun coloquio arredor da figura de Begoña Caamaño, da súa traxectoria como escritora e xornalista e da vixencia do seu legado cultural e feminista.
O documental foi producido pola Real Academia Galega a través da produtora Miramemira e contou co apoio da Deputación da Coruña, da Xunta de Galicia e do Ministerio de Ciencia, Innovación e Universidades.