A Rede Museística Provincial leva aos seus catro museos a exposición '500 Mulleres na Arte'
A Rede Museística Provincial de Lugo incorporará á programación do seu 20º aniversario a exposición '500 Mulleres na Arte', un proxecto da artista e investigadora Concha Mayordomo que busca visibilizar o papel das mulleres na historia da creación artística e contribuír á recuperación da memoria de autoras que quedaron fóra dos relatos tradicionais da arte.
A mostra inaugurarase o vindeiro 2 de setembro na Sala de Exposicións da Deputación de Lugo e poderá visitarse nos catro museos da Rede Museística Provincial ata finais do mes de outubro. A iniciativa forma parte das actividades conmemorativas do vinte aniversario da Rede e está coordinada por Encarna Lago.
O proxecto ten un marcado carácter divulgativo e didáctico e nace co obxectivo de combater o nesgo de xénero existente na historia das Belas Artes. A través dun amplo traballo de investigación, recompílase información sobre creadoras, teóricas e mecenas que, malia obter recoñecemento nas súas épocas, quedaron posteriormente relegadas ou excluídas dos canons académicos.
'500 Mulleres na Arte' preséntase como un arquivo documental e unha catalogación biográfica que combina a investigación histórica coa creación plástica. A exposición está organizada como unha guía visual e xenealóxica na que o público poderá acceder, mediante códigos QR, ás biografías completas recollidas no arquivo dixital do proxecto.
Entre as artistas incluídas na mostra figuran 33 creadoras galegas, das que nove son naturais da provincia de Lugo. A iniciativa pretende así poñer en valor a contribución das mulleres á historia da arte e ofrecer unha ferramenta de referencia tanto para o público xeral como para persoas investigadoras interesadas nos estudos de xénero e na arte contemporánea.
Tras percorrer diferentes puntos do Estado, a exposición chega agora á provincia de Lugo co propósito de achegar este fondo documental á cidadanía e promover o recoñecemento das mulleres no ámbito artístico.