A xornada xuvenil 'Xuventude na Onda' celébrase na Cidade da Cultura o 12 de novembro
A Cidade da Cultura de Santiago de Compostela celebrará o vindeiro 12 de novembro unha nova edición de ‘Xuventude na Onda’, unha xornada pensada para achegar á mocidade referentes profesionais, oportunidades formativas e propostas de lecer, todo iso con entrada de balde.
A cita reunirá unha vintena de actividades distintas, combinando música, humor, xogos e encontros con profesionais de diversos ámbitos. Entre as propostas musicais destaca a actuación de 9Louro, que ofrecerá un concerto, xunto á participación de Sara Gimeno. O apartado do humor correrá a cargo de Xurxo Carreño.
Quen desexe asistir deberá inscribirse previamente a través da páxina web de Xuventude, onde poderá consultar o programa completo da xornada.
Mentoría, emprego e intelixencia artificial
Máis aló do entretemento, a xornada busca converterse nun punto de encontro entre a mocidade, mentores, institucións académicas e empresas colaboradoras de iniciativas como Xuventude Mentoring e Fórmate na Empresa. O obxectivo é ofrecer un espazo onde os asistentes poidan informarse sobre os perfís profesionais máis demandados na actualidade e comprender como a intelixencia artificial está a transformar o mercado laboral.
Tamén terá cabida un bloque adicado á creación de contidos de calidade, con especial atención ao uso do humor como ferramenta de comunicación. Neste apartado participarán o propio Xurxo Carreño e a xornalista Esther Estévez, presentadora do espazo audiovisual ‘Dígocho eu?’.
A programación inclúe ademais unha actividade práctica sobre alimentación saudable, titulada ‘Teño fame e cero ganas’, a cargo de Moncho Méndez, do restaurante Millo, quen amosará de xeito ameno como elaborar receitas rápidas e sinxelas afastadas da comida ultraprocesada.
‘Mente en forma’, o deporte e a saúde mental
A xornada incorporará tamén o programa ‘Mente en forma’, posto en marcha o ano pasado para concienciar sobre a importancia da saúde mental no ámbito deportivo. Nesta edición participarán o atleta internacional Pedro Nimo, campión de España de maratón; o futbolista e creador de contido Miguel Mandayo; o piloto de rallies Adrián Vázquez, tres veces gañador da Copa Hyundai i20N no Rally de Ourense; e Álvaro Soneira, do Obradoiro Club de Amigos de Baloncesto.
Espazos de lecer
Durante toda a xornada, os asistentes poderán gozar tamén de distintas propostas de lecer, entre elas un circuíto de drons e actividades interactivas con pezas de Lego e realidade virtual, pensadas para fomentar a interacción entre os participantes.