A Xunta licitará por máis de 50 millóns a escavación para levantar o novo edificio asistencial do CHUAC
A Xunta licitará por máis de 50 millóns de euros a fase 2.1 da ampliación do Complexo Hospitalario Universitario da Coruña (CHUAC), unha actuación que inclúe a escavación sobre a que se construirá o futuro edificio asistencial. O anuncio realizouse durante a reunión da comisión de seguimento das obras, na que participaron responsables da Axencia Galega de Infraestruturas, do Sergas e da Área Sanitaria da Coruña e Cee.
Segundo explicou a directora da Axencia Galega de Infraestruturas, María Deza, esta fase contempla as actuacións previas necesarias para o desenvolvemento do novo edificio, entre elas demolicións, escavacións, movementos de terra e a xestión dos materiais xerados durante os traballos. A previsión da Xunta é adxudicar o contrato antes de que remate o ano para iniciar as obras o antes posible.
Entre os traballos previstos tamén figura a demolición de 17 vivendas unifamiliares situadas na zona de Curramontes, así como a retirada e adaptación das redes de servizos afectadas pola actuación.
No encontro tamén se repasou o estado do resto das obras que forman parte da ampliación do CHUAC. A escavación necesaria para construír a futura Torre Polivalente xa está rematada, polo que o seguinte paso será iniciar a estrutura deste edificio destinado a usos administrativos. Ademais, este verán demoliranse tres das vivendas expropiadas máis próximas á futura torre.
Pola súa banda, o xerente da Área Sanitaria da Coruña e Cee, Luis Verde, asegurou que as obras continúan desenvolvéndose sen interferir na actividade asistencial grazas á planificación e coordinación entre os equipos técnicos e sanitarios. Segundo indicou, nos dous últimos meses celebráronse máis de vinte reunións para adaptar o proxecto ás necesidades dos distintos servizos hospitalarios.
Verde tamén avanzou que a denominada fase 0.2 suporá un investimento de arredor de 10 millóns de euros para acometer melloras no interior do hospital. Entre elas inclúense a ampliación das unidades de diálise, reanimación e resonancia magnética, a creación dunha área de probas funcionais de pneumoloxía e rehabilitación cardíaca e respiratoria e a ampliación do ximnasio e da área de terapia ocupacional da unidade de lesionados medulares.
En canto aos accesos ao complexo hospitalario, os traballos céntranse actualmente na construción do novo viaduto sobre a AC-12, unha vez executado o viario provisional e demolido o antigo paso elevado. O investimento total nesta actuación ascende a 26 millóns de euros, dos que o Concello da Coruña financia 22,2 millóns a través do convenio asinado coa Xunta.