Cultura

A Axencia para a Modernización Tecnolóxica de Galicia xa puxo á disposición dos equipos de tradución os primeiros contidos da plataforma

As principais administracións públicas con presenza en Galicia subscribiron este xoves unha declaración institucional destinada a fomentar o uso do galego nas relacións entre a cidadanía e as forzas e corpos de seguridade. A iniciativa, promovida pola Irmandade Xurídica Galega (Ixuga), foi presentada nun acto celebrado no Paraninfo da Universidade de Santiago de Compostela, no que participaron representantes do Goberno central, da Xunta de Galicia, da Fiscalía Superior de Galicia, da Fegamp e da propia entidade organizadora.

Durante o acto, a secretaria de Estado de Seguridade, Aina Calvo, destacou o valor simbólico e institucional deste compromiso, que definiu como unha mostra da fortaleza democrática e do respecto aos dereitos lingüísticos da cidadanía. Na súa intervención, sinalou a necesidade de garantir que os servizos de seguridade poidan atender á poboación tamén na súa lingua propia.

A declaración contou coa presenza do delegado do Goberno en Galicia, Pedro Blanco; do secretario xeral da Lingua, Valentín García; da fiscal superior de Galicia, Carmen Eiró; da vicepresidenta da Federación Galega de Municipios e Provincias, María Barral; e do presidente de Ixuga, Xoaquín Enrique Monteagudo.

Monteagudo subliñou que o futuro do galego tamén depende da súa presenza en ámbitos estratéxicos como o da seguridade pública e puxo en valor o elevado número de axentes galegofalantes que prestan servizo na comunidade. Unha realidade que a secretaria de Estado exemplificou indicando que nove de cada dez efectivos destinados en Galicia son de orixe galega.

Pola súa banda, Valentín García incidiu na importancia de avanzar na normalización do galego en todos os ámbitos da administración e destacou a colaboración entre institucións para incrementar a presenza da lingua propia en sectores como o xurídico e o administrativo. Neste contexto, anunciou que xa se iniciaron os traballos para traducir ao galego o sistema de xestión procesual Atenea, que substituirá ao actual sistema Minerva.

Segundo explicou, a Axencia para a Modernización Tecnolóxica de Galicia xa puxo á disposición dos equipos de tradución os primeiros contidos da plataforma, un paso que considera relevante para favorecer o uso do galego na Administración de Xustiza.

O secretario xeral da Lingua tamén agradeceu a participación da Irmandade Xurídica Galega na actualización do Plan Xeral de Normalización da Lingua Galega, un documento que a Xunta prevé presentar o vindeiro 15 de xullo e que incluirá medidas específicas para promover a presenza do galego nas forzas e corpos de seguridade.

A sinatura desta declaración busca consolidar o dereito da cidadanía a relacionarse en galego cos servizos de seguridade e reforzar a presenza da lingua propia nun ámbito considerado clave para a normalización lingüística.