As oposicións do Sergas en Silleda rexistran unha participación próxima ao 78 %
O Recinto Feiral Internacional de Silleda foi escenario esta mañá dunha nova xornada de exames dentro do proceso de oposicións do Servizo Galego de Saúde. As probas, correspondentes ás categorías de médico de admisión e documentación clínica, técnico superior de sistemas e tecnoloxías da información, traballador social e mecánico, rexistraron unha taxa de presentación do 78,16 %.
Das 1.493 persoas admitidas para concorrer a esta quenda, finalmente acudiron a realizar os exercicios 1.167 opositores.
Desagregando os datos por categorías, no caso de médico de admisión e documentación clínica examináronse 41 dos 57 candidatos convocados. En técnico superior de sistemas e tecnoloxías da información acudiron 63 dos 91 admitidos. A categoría de traballador social, a máis numerosa desta convocatoria, reuniu a 858 dos 1.068 inscritos, mentres que en mecánico presentáronse 205 das 277 persoas admitidas.
Respecto ao número de postos que se cubrirán, a oferta contempla 5 prazas para médico de admisión e documentación clínica, 9 para técnico superior de sistemas e tecnoloxías da información, 57 para traballador social e 5 para mecánico.
A partir das 16.00 horas desta mesma tarde, un total de 8.003 persoas teñen previsto examinarse para optar a unha das 192 prazas convocadas no grupo auxiliar da función administrativa.
Máis de 10.000 aspirantes a vindeira fin de semana
O calendario de exames do sistema sanitario público galego non remata aquí. Os días 14 e 15 de novembro celebrarase unha nova quenda de probas na que están chamados a participar 10.172 opositores.
O sábado, desde as 9.30 horas, o recinto feiral de Silleda recibirá aos aspirantes de varias categorías: 34 candidatos a médico xeral da Axencia de Doazón de Órganos e Sangue (6 prazas), 655 admitidos en farmacéutico de atención primaria (31 prazas), 196 en odontoloxía de atención primaria (8 prazas), 104 en técnico en xestión de sistemas e tecnoloxías da información (9 prazas) e 181 na categoría de calefactor (7 prazas).
Esa mesma tarde, a partir das 16.00 horas, desenvolveranse os exames para a categoría de celador, aos que están convocadas 7.800 persoas entre a quenda xeral e a de discapacidade intelectual, para cubrir 348 postos.
O domingo 15 de novembro porá fin a esta rolda de convocatorias. Desde as 9.30 horas, Silleda acollerá a 1.202 aspirantes repartidos entre as categorías de médico asistencial do 061 (139 admitidos para 8 prazas), terapeuta ocupacional (273 admitidos para 11 prazas), dietista-nutricionista (363 admitidos para 45 prazas) e electricista (427 admitidos para 11 prazas).
En conxunto, o proceso selectivo deste outono permitirá cubrir 2.223 prazas no ámbito sanitario público galego.