Política

Reprocha a Feijóo e Rueda que lle fallasen á emigración galega coa Lei de Netos: “Moita morriña nos discursos e moi pouca dignidade cando toca defendelos”

O secretario xeral do PSdeG, José Ramón Gómez Besteiro, chamou hoxe o partido a “saír a gañar” as eleccións municipais con orgullo, unidade e mobilización, nun discurso ante o Comité Nacional reunido en Santiago de Compostela no que contrapuxo os resultados das políticas progresistas do Goberno de España coa parálise da Xunta de Alfonso Rueda. Advertiu contra a tentación de comprar o marco da dereita e caer no desánimo, “non cabe nesta situación o derrotismo”, e defendeu a crítica interna honesta e “o traballo en clave de unidade” como fortaleza dun partido que aspira a gobernar máis: “Quen poida gobernar, que goberne. E as políticas progresistas, p’alante”.

Besteiro comezou pola súa propia historia. Este venres cumpríronse once anos da súa primeira imputación, o 3 de xullo de 2015, nunha causa que rematou integramente arquivada. Lembrou que ao recoller aquel auto xudicial pensou que “tiña que estar falando doutra persoa” e reclamou desde esa experiencia respecto para as persoas sinaladas e para a presunción de inocencia. Negar que se están vivindo “operacións político-xudiciais”, dixo, sería inxenuidade “ou estar a outras cousas”. A resposta do partido ante a corrupción resúmese en tres palabras: “Contundencia, limpeza e desculpas”. E marcar as diferenzas co PP “non significa aplicar o tan denostado e ti máis”: a obriga dos socialistas é “presentar aos cidadáns o noso modelo fronte a outro modelo”.

Eses gobernos progresistas, defendeu, teñen resultados que se poden tocar en Galicia: 11.614 millóns de financiamento autonómico este ano, cifra récord e un 40% máis do que achegaba o Estado na etapa de Rajoy; 4.000 millóns do Plan de Recuperación; 1.000 millóns dos PERTE industriais; un 73% máis de prazas MIR desde 2018 e un 126% máis en Atención Primaria; 420 millóns de aforro nas peaxes da AP-9; e máis de 400 euros de suba na pensión media galega. “Non o vexamos como unha herdanza. Son o noso aval e o pegamento que nos une á maioría social”, resumiu.

O contraste chegou co retrato de Rueda: un presidente sen proxecto real, sen planificación e sen obxectivos, baixo o que nunca tanta xente quedou sen vivenda, sen médicos e sen os cartos que lle corresponden a Galicia. “Non se pode gobernar a golpe de bono”, denunciou: Bono Coidado, Bono Peixe, Bono Rural, Bono Comercio, Bono Cultural. “É a mellor metáfora dun goberno que substitúe dereitos por parches. O problema é converter os dereitos en cheques que compran vontades”.

Fronte a iso, reivindicou a proposta que os socialistas levaron ao debate do estado da autonomía, o Bono Goberno: “A cidadanía galega xa cumpriu, paga impostos. Agora falta que a Xunta cumpra con algo tan revolucionario para eles como é gobernar”.

A vivenda resume ese fracaso. Máis de 34.000 persoas agardan hoxe por unha vivenda pública en Galicia, o dobre que cando Rueda tomou posesión, mentres o Goberno de España leva achegados 548 millóns desde 2018 para unha competencia que é exclusiva da Xunta. En 17 anos de gobernos do PP houbo exercicios enteiros con cero vivenda pública construída. A alternativa socialista: vivenda pública “sempre pública”, orientada ao alugueiro, que concentra o 80% da demanda, e rehabilitación dos barrios e dos parques de vivenda desde os concellos.

O segundo fracaso ten nome de lista de espera: 350.000 persoas agardando por unha cita médica, 50.000 por unha operación e 120 concellos sen pediatra. E o último invento da Xunta, premiar con 2.500 euros as altas laborais máis rápidas: “É poñerlle prezo á saúde”. Na industria, dos 19 proxectos estratéxicos anunciados pola Xunta catro xa caeron, e o Goberno galego limítase a declaralos estratéxicos sen achegar orzamento ningún. Mentres, Pedro Sánchez traía SAIC a Galicia fronte a competidores como Marrocos, Cataluña ou Valencia. E sobre os incendios, lembrou que o acordo parlamentario de 2018 co PP segue sen cumprirse oito anos despois, co Pladiga aprobado fóra de prazo e as medidas de prevención sen executar: “Non aprendemos nada de todo o que pasou”.

Besteiro esixiulle ademais a Rueda que deixe de amparar as posicións de Feijóo cunha confrontación estéril co Goberno de España: “O interese do presidente da Xunta ten que ser defender o interese de Galicia”. E puxo os exemplos: négase a sentar co Estado para negociar o financiamento autonómico, no que a oferta actual de 585 millóns se pode mellorar ata os 900, e rexeita unha quita de débeda de 4.010 millóns, un terzo da débeda galega, que se podería destinar a sanidade, servizos sociais e dependencia. Fronte a ese oportunismo, reivindicou o papel decisivo dos socialistas en Altri, parado porque “os e as socialistas puxeron pé en parede”, na recuperación de Alcoa, hoxe con todas as cubas funcionando, e na transferencia da AP-9: “Nos temas importantes somos nós os que decidimos a política aquí en Galicia”.

O momento máis duro do discurso chegou coa emigración. Besteiro acusou o PP de cruzar unha liña na súa “deriva trumpista” ao desprezar abertamente os fillos e netos de quen marchou porque Galicia non lles daba futuro: “Durante anos chamáronlles embaixadores de Galicia. Agora, cando sospeitan que non votan como eles queren, trátanos como galegos de segunda. Moita morriña nos discursos e moi pouca dignidade cando toca defendelos”. Confesou que sentiu vergoña cando Feijóo propuxo liquidar a Lei de Netos e tamén cando Rueda calou, e denunciou que o PP responde “amén” á proposta de Vox de suprimir o voto exterior. E pechou cunha declaración de principios: “Feijóo e Rueda falláronlle á emigración galega. Nós non lle imos fallar. Para nós non hai galegos de primeira e de segunda. Hai galegos, estean onde estean”.

No peche, Besteiro volveu ás municipais, “un reto apaixonante” porque nos concellos non hai forma de escapar: “ante os veciños e as veciñas hai que dar a cara”. Onte rematou o prazo de presentación de candidaturas nos concellos de máis de 20.000 habitantes e o secretario xeral felicitou os candidatos e candidatas, chamando a vivir as primarias pensando “na xente que non forma parte do noso partido”. Reivindicou con orgullo a xestión socialista en Vigo, A Coruña, Vilagarcía ou Ferrol, e comprometeuse a recuperar Lugo da man de Miguel Fernández tras unha moción de censura na que o PP se apoiou nunha tránsfuga entrando “pola porta de atrás”: “É un símbolo do que imos recuperar dentro de dez meses”.

E rematou apelando á mobilización de todo o partido para o ciclo que comeza: “Con orgullo, con decisión e con compromiso, imos ter máis alcaldías que nunca”.