Chayanne actuará en Castrelos o 30 de xullo dentro do programa Vigo en Festas 2026
O cantante portorriqueño Chayanne será o segundo artista confirmado para o programa de concertos de Vigo en Festas 2026. O alcalde da cidade, Abel Caballero, anunciou que o artista actuará no auditorio de Castrelos o vindeiro 30 de xullo.
Durante o concerto, o público poderá escoitar algúns dos grandes éxitos da súa carreira, como Torero, Bailando Bachata, Dejaría todo ou Salomé.
Un referente do pop latino
Chayanne é unha das figuras máis recoñecidas do pop latino a nivel internacional, cunha traxectoria de máis de catro décadas sobre os escenarios.
Ao longo da súa carreira vendeu máis de 50 millóns de discos e logrou que 25 das súas cancións alcanzasen o número un nas listas de éxitos.
O artista chegará a Vigo dentro da súa xira Bailemos otra vez, coa que está a percorrer diferentes escenarios internacionais.
Na actualidade conta con máis de 16 millóns de oíntes mensuais na plataforma Spotify e acumula centos de millóns de reproducións das súas cancións.
Vigo en Festas
Segundo destacou o rexedor vigués, a contratación do artista responde ás numerosas peticións realizadas pola cidadanía.
“Temos miles e miles de peticións para traer a Chayanne, e se mo pide a xente de Vigo pois ten que vir Chayanne”, sinalou Caballero.
Co concerto do artista portorriqueño, o público poderá desfrutar dunha ampla selección dos seus temas máis coñecidos nun espectáculo pensado para facer bailar aos asistentes.
Chayanne súmase así ao cartel de Vigo en Festas 2026, no que tamén está confirmada a actuación do grupo indie Viva Suecia, que actuará no mesmo escenario o 14 de agosto.
Concertos confirmados en Castrelos
Chayanne – 30 de xullo
Viva Suecia – 14 de agosto