Descenden un 57,7 % en Galicia os lanzamentos por falta de pagamento de alugueiro
Os tribunais de instancia galegos practicaron no primeiro trimestre deste ano 156 lanzamentos, un 50,2% menos que en 2025. Deles, 114 foron consecuencia de procedementos derivados da Lei de Arrendamentos Urbanos (LAU), é dicir, por falta de pagamentos de alugueiro, os cales descenderon un 57,5 %. Outros 33 corresponderon a execucións hipotecarias -un 3,1 % máis- e, os nove restantes, derivaron doutras causas.
En Galicia, no período estudado, practicáronse, por cada 100.000 habitantes, 4,2 lanzamentos derivados da LAU; e 1,2, de execucións hipotecarias. No conxunto do Estado, os lanzamentos executados entre xaneiro e marzo descenderon un 45,4 % respecto ás mesmas datas de 2025, segundo se desprende do informe ‘Efectos da crise económica nos órganos xudiciais’, feito público hoxe pola Sección de Estatística do CXPX.
O número de execucións hipotecarias iniciadas na comunidade no primeiro trimestre do ano descendeu un 1,3 %, en comparación ás mesmas datas de 2025. No período estudado presentáronse 222 procedementos que permiten esixir o pago das débedas garantidas por peza ou hipoteca ao acredor, fronte aos 225 do ano anterior.
O estudo tamén reflicte que no período estudado os tribunais de instancia galegos ingresaron 26 demandas por ocupación ilegal de vivendas en casos nos que os propietarios son persoas físicas, entidades sen ánimo de lucro ou entidades públicas posuidoras de vivenda social, fronte ás 22 das mesmas datas de 2025. Poñendo en relación o número de procedementos ingresados coa poboación, en Galicia rexistráronse 1 por cada 100.000 habitantes.
Os órganos xudiciais galegos rexistraron durante o primeiro trimestre deste ano 748 concursos, un 5,9 % máis que no mesmo período de 2025. Na comunidade presentáronse, no período estudado, un total de 27,6 concursos por cada 100.000 habitantes, por baixo da media estatal, que se situou en 38,9.
Os primeiros datos de 2026 mostran, polo tanto, que continúa consolidándose o incremento no número de concursos, aínda que de forma máis contida, en comparanza cos primeiros trimestres de anos anteriores: nese período, en 2024 a subida foi do 79 %, e, en 2025, do 16,3 %.
Os presentados por persoas naturais sen actividade empresarial creceron un 7 % respecto ás mesmas datas de 2025, ao pasar de 673 a 682. Os de persoas xurídicas -empresas- seguen coa súa tendencia á baixa, pois sufriron un descenso interanual do 12,7 %, ao interpoñerse 48, fronte aos 55 do primeiro trimestre de 2025, mentres que os de persoas naturais empresarias pasaron de 14 a 18, un 28,6 % máis.
O 17 de agosto de 2023 entrou en vigor a Lei Orgánica 7/2022, do 27 de xullo, de modificación da Lei Orgánica 6/1985, do 1 de xullo, do Poder Xudicial, en materia de xulgados do Mercantil, que fixo que os concursos de persoas naturais non empresarias, que se viñan coñecendo polos xulgados de Primeira Instancia e Primeira Instancia e instrución, pasasen a ser competencia dos xulgados do Mercantil, na actualidade Seccións do Mercantil dos Tribunais de Instancia. Por iso, ten máis sentido realizar unha análise dos concursos polo tipo de persoa, física ou xurídica, á que afectan, en lugar de polo tipo de xulgado que os coñece.
Respecto aos expedientes do artigo 169 TRLC, relativo á modificación substancial das condicións de traballo de carácter colectivo (ERE), presentáronse 5 expedientes, fronte aos 9 do mesmo trimestre de 2025.
Demandas por despedimento e reclamación de cantidade
No primeiro trimestre de 2026 rexistráronse nas Seccións do Social 1.809 demandas por despedimento, cifra que mostra un aumento do 13,4 % respecto ás presentadas o ano anterior. O número de demandas por reclamacións de cantidade interpostas nas Seccións do Social, 1.970, foi un 30,9 % inferior ao rexistrado no mesmo período de 2025.
O estudo, ademais, mostra un aumento dos procedementos monitorios presentados entre xaneiro e marzo de 2026 nos tribunais de instancia. En Galicia interpuxéronse 9.916, fronte aos 23.967 do ano anterior, o que supuxo un descenso interanual do 58,6 %.
O procedemento monitorio serve para reclamar débedas diñeirarias líquidas, determinadas, vencidas e exixibles, e inclúen as cantidades debidas en concepto de gastos comúns de comunidades de propietarios de inmobles urbanos. A mediación é obrigatoria para a presentación dun proceso monitorio desde o 3 de abril, o que puido ter impacto no número de procedementos presentados antes desa data.