O xuíz mantén a imputación por prevaricación e rexeita ampliar a causa contra Pérez Jácome
O maxistrado instrutor da causa aberta contra o alcalde de Ourense, Gonzalo Pérez Jácome, mantén o seu criterio e non considera necesario ampliar a investigación a novos delitos. Polo momento, o procedemento limítase a unha posible prevaricación continuada, en liña co auto ditado o pasado mes de abril, no que ademais se daba por pechada a fase de instrución.
A acusación particular, exercida polo exconcelleiro Telmo Ucha, sostén que os feitos tamén poderían constituír delitos de malversación e falsidade documental. Esta parte solicita penas de prisión, inhabilitacións prolongadas e unha indemnización ao Concello de Ourense próxima ao medio millón de euros.
Pola súa banda, a Fiscalía aprecia unicamente indicios de prevaricación. No seu informe, sinala a posible incompatibilidade entre a actividade privada do alcalde, vinculada a Auria TV e con ingresos relevantes, e o seu cargo público.
Mentres tanto, a defensa de Jácome solicita o arquivo da causa e que o rexedor non chegue a sentar no banco dos acusados.
IMPUTADO POR PREVARICACIÓN
Gonzalo Pérez Jácome foi imputado o 14 de abril por un presunto delito continuado de prevaricación, relacionado coa compatibilidade do seu cargo público con actividades privadas, especialmente vinculadas a Auria TV, sen a autorización correspondente.
Segundo a instrución, o alcalde tería actuado de forma “arbitraria” e sen respaldo legal ao non someter a decisión ao órgano competente, o pleno municipal, malia estar obrigado a facelo. O xuíz considera que o fixo con coñecemento da posible ilegalidade e do prexuízo que podería supoñer para as arcas municipais.
O auto xudicial sostén ademais que a falta de regularización destas actividades resulta especialmente relevante por tratarse de ingresos significativos. En varias ocasións, o alcalde tería rexeitado solicitar a compatibilidade, alegando que non era necesario, unha interpretación que o xuíz descarta.
A resolución cualifica a conduta atribuída ao rexedor como unha vulneración “grave” da normativa, subliñando que tería sido consciente dos seus efectos.
O instrutor tamén apunta que durante un período aproximado de sete anos o alcalde tería percibido máis de 430.000 euros en concepto de salario público, distribuídos en distintas anualidades entre 2020 e 2025.
Ademais, a instrución recolle que Jácome chegou a presentar unha solicitude de compatibilidade que posteriormente retirou antes do seu debate en pleno. Este comportamento é cualificado de chamativo polo xuíz, que o interpreta como un indicio de coñecemento de que dita compatibilidade podería non ser aprobada.