Expomar converte Burela no epicentro do debate pesqueiro europeo coa celebración das súas Xornadas Técnicas
O porto de Burela volverá situarse esta semana no centro do debate pesqueiro nacional e europeo coa celebración das XXXIII Xornadas Técnicas e do XXVII Encontro Empresarial organizados pola Fundación Expomar. O evento, que conta coa cofinanciación da Consellería do Mar da Xunta de Galicia e do Fondo Europeo Marítimo, de Pesca e de Acuicultura 2021-2027, reunirá a destacados representantes institucionais, organizacións profesionais e expertos vinculados ao mundo do mar.
As actividades desenvolveranse entre o mércores 13 e o xoves 14 de maio, consolidando unha vez máis a Burela como punto de encontro para o intercambio de coñecementos e a análise da situación actual do sector pesqueiro. O programa abordará cuestións relacionadas coa xestión pesqueira, o futuro profesional da actividade, o relevo xeracional, a formación, a sustentabilidade ou a seguridade laboral.
O XXVII Encontro Empresarial abrirá a programación o mércores pola tarde nas instalacións de Armadores de Burela. Nesa sesión participarán entidades representativas da pesca galega, estatal e europea co obxectivo de reflexionar sobre os principais retos que afronta o sector. Das conclusións dese encontro sairán as chamadas “Conclusións 2026”, un documento que recollerá as principais propostas e reflexións xurdidas durante a reunión e que será presentado ao día seguinte no arranque oficial das Xornadas Técnicas.
Xa o xoves, o salón de actos da Confraría de Pescadores de Burela acollerá a apertura institucional do encontro, que tamén poderá seguirse en directo a través da páxina web de Expomar. O acto contará coa presenza da conselleira do Mar, Marta Villaverde; do director xeral de Pesca Sostible do Ministerio de Agricultura, Pesca e Alimentación, Ramón de la Figuera; e da presidenta da Fundación Expomar e alcaldesa de Burela, Carmela López.
Ao longo da mañá desenvolveranse tres mesas de debate centradas nas principais preocupacións da actividade pesqueira. A primeira delas xirará arredor da xestión pesqueira e reunirá representantes da administración e do propio sector para intercambiar impresións sobre os desafíos actuais. Participarán Javier Garat, en representación de Cepesca e Europeche; Torcuato Teixeira, da Federación Nacional de Confrarías; e Ramón de la Figuera, desde o Ministerio de Agricultura, Pesca e Alimentación.
A continuación abordarase o futuro do sector desde a perspectiva do relevo xeracional e da formación profesional. Neste coloquio intervirán Francisco González, docente en EONP Xixón e exdirector xeral de Pesca do Principado de Asturias; Ángeles Vázquez, directora xeral de Desenvolvemento Pesqueiro da Xunta de Galicia; e Manuel Pablos López, subdirector xeral de Sustentabilidade Económica e Asuntos Sociais do MAPA.
A sesión matinal concluirá cunha mesa centrada na sustentabilidade, a socioeconomía e os hábitos de consumo vinculados á pesca. Neste debate participarán os catedráticos da Universidade de Santiago de Compostela María Bastida e Gumersindo Feijóo, xunto coa nutricionista Adriana Fernández.
Xa pola tarde, as Xornadas Técnicas continuarán cunha presentación a cargo da directora xeral da Mariña Mercante, Ana Núñez, quen abordará cuestións relacionadas coa Comisión Nacional de Seguridade e Saúde no Traballo e coa prevención de accidentes laborais no sector marítimo.
O peche do programa chegará cun coloquio centrado na situación da pesca no Parlamento español. Nel participarán tres representantes galegos con presenza no Congreso: Rosa Quintana, polo Partido Popular; Patricia Otero, polo PSdeG-PSOE; e Néstor Rego, polo BNG.
A edición deste ano estará conducida e moderada pola comunicadora e presentadora da Televisión de Galicia Lucía Rodríguez, encargada de dinamizar unhas xornadas que volverán converter Burela nun espazo de reflexión e análise sobre o presente e o futuro da pesca.