Goretti Sanmartín defende a contratación de persoas con discapacidade como unha obriga ética das administracións
A alcaldesa de Santiago, Goretti Sanmartín, destacou a obriga ética e legal das administracións públicas de fomentar a contratación de persoas con discapacidade, durante a inauguración do congreso da Asociación Empresarial Galega de Centros Especiais de Emprego sen ánimo de lucro (Cegasal), celebrado no Cersia.
Na súa intervención, a rexedora subliñou que o acceso a un traballo remunerado é unha das principais vías de inclusión social para as persoas con discapacidade, polo que considerou imprescindible que as institucións públicas lideren este compromiso.
Sanmartín defendeu que as administracións deben dar exemplo mediante políticas activas de contratación que favorezan a integración laboral e a igualdade de oportunidades, incidindo en que a creación de emprego de calidade é unha responsabilidade compartida.
A alcaldesa lembrou tamén o papel pioneiro do Concello de Santiago neste ámbito, destacando iniciativas como a contratación do primeiro centro especial de emprego de Galicia para a recollida de papel e cartón, así como a incorporación de persoas con discapacidade en servizos como o mantemento de zonas verdes.
Ademais, sinalou que desde 2017 o Concello establece un mínimo do 5% da contratación en determinados servizos —como mantemento de zonas verdes, restauración, recollida de residuos ou servizos auxiliares— reservado a centros especiais de emprego e empresas de inserción.
Aínda así, recoñeceu as dificultades existentes para garantir o cumprimento destes obxectivos na Administración local, e comprometeuse a seguir avanzando na ampliación das cotas de contratación reservada.