Imputan a Jácome por presunta prevaricación ao non solicitar a compatibilidade entre os seus ingresos públicos e privados
Gonzalo Pérez Jácome foi imputado esta mañá por un presunto delito continuado de prevaricación ao compatibilizar o seu cargo con actividades privadas, especialmente no relacionado con Auria TV, sen a correspondente autorización.
O xuíz considera que Jácome actuou de forma “arbitraria” e “carente de respaldo legal”, ao non someter esta decisión ao órgano competente, é dicir, ao pleno municipal, “a pesar de ter obriga legal de facelo e a sabiendas da ilegalidade que iso supón e do prexuízo que conleva para as arcas municipais ao cobrar un salario que, de non serlle concedida a compatibilidade, non tería dereito a percibir”, acusándoo de ter un comportamento “obstrucionista”.
Segundo o xuíz, a necesidade de regularizar estas actividades faise aínda máis evidente ao tratarse de “ingresos de certa entidade”, pero o alcalde negouse en varias ocasións a facelo alegando que non tiña obriga, un argumento que a xustiza rexeita, afirmando que “o que non é axustado á lei é que o investigado realice unha interpretación individualizada e totalmente favorable aos seus intereses afirmando que non ten obriga de presentar a solicitude de compatibilidade”.
É máis, o xuíz asegura que a conduta mantida ata a data polo alcalde de Ourense é “unha vulneración absolutamente groseira” da lexislación, sendo “plenamente consciente diso” e a sabiendas “da inxustiza que podería xerar esa situación e do grave dano que se causaba ás arcas municipais ao cobrar unha cantidade en concepto de salario á que non tería dereito se non se lle recoñece a compatibilidade discutida”.
Neste sentido, o maxistrado advirte de que durante aproximadamente 7 anos o alcalde de Ourense tería percibido fondos públicos aos que non tería dereito en caso de ter sometido a decisión ao pleno e de que este a tivese rexeitado. Uns anos nos que o alcalde se tería embolsado unha suma de máis de 430.000 euros: 69.925,94 en 2020, 70.555,24 en 2021, 73.024,70 en 2022, 75.215,42 en 2023, 77.457,30 en 2024 e 66.699,96 ata novembro de 2025.
A situación agrávase, segundo a instrución, ao coñecerse que Jácome chegou a presentar un escrito solicitando a compatibilidade e que, con todo, foi retirado antes da celebración do pleno. O xuíz cualifica de “estraño” o comportamento do alcalde ao retirar dito documento, asegurando que a súa actitude leva a pensar que “tiña plena conciencia de que non se lle ía recoñecer a referida compatibilidade”.
Agora, o xuíz deu 10 días á Fiscalía e á Acusación Particular para formular acusación. O alcalde de Ourense podería enfrontarse a unha pena de entre 9 e 15 anos de inhabilitación especial para cargo público.