MercaNaVila esgota os cinco millóns de euros en bonos en 18 días e xera 11,5 millóns en vendas
A segunda edición de MercaNaVila pechou antes do previsto tras esgotar os cinco millóns de euros destinados a descontos no comercio local da provincia da Coruña. A campaña, impulsada pola Deputación en colaboración coa Federación Galega de Comercio, conseguiu mobilizar preto de 11,5 millóns de euros en vendas nos establecementos dos concellos de menos de 20.000 habitantes.
A iniciativa finalizou tras apenas 18 días, cando aínda estaba previsto que continuase ata o 20 de novembro. Durante este tempo descargáronse máis de 102.000 bonos e realizáronse máis de 200.000 operacións de compra. Os descontos, de ata 100 euros por persoa, buscaban incentivar o consumo nos negocios de proximidade e apoiar as economías locais.
A participación dos establecementos tamén medrou nesta edición, con 1.143 comercios adheridos, fronte aos arredor de 1.000 da primeira convocatoria. A Deputación destaca a implicación dos negocios, das asociacións comerciais e dos concellos na difusión da campaña e na axuda á cidadanía para descargar e utilizar os bonos.
No ámbito municipal, As Pontes acadou máis de 419.000 euros en vendas, mentres que Ordes superou o millón de euros e Betanzos rexistrou máis de 632.000 euros. Pola súa banda, Sada alcanzou os 223.000 euros. Estes catro municipios figuran entre os que rexistraron unha maior actividade comercial durante a campaña.
Desde a Deputación destacan a boa acollida da iniciativa e o seu papel para reforzar o comercio de proximidade, especialmente nos municipios máis pequenos, onde estes establecementos contribúen a manter o emprego, ofrecer servizos e dinamizar a vida das vilas.
O presidente provincial, Valentín González Formoso, situou o apoio ao pequeno comercio entre as prioridades da institución, incidindo na importancia de facilitar ferramentas aos negocios locais para competir coas grandes superficies e as plataformas de venda en liña.