Milleiros de persoas saen á rúa en Santiago en apoio a Palestina
Milleiros de persoas percorreron este domingo, 4 de outubro, as rúas de Santiago de Compostela nunha manifestación de solidariedade co pobo palestino convocada pola plataforma Galiza pola Paz e a asociación Galiza por Palestina. A mobilización, respaldada por máis de 60 entidades e organizacións do tecido social galego, desenvolveuse baixo o lema "Galiza con Palestina. Resistencia, liberdade e paz".
A convocatoria produciuse no marco do terceiro ano de xenocidio en Palestina e cando se cumpre un ano da aplicación do plano de paz promovido polos Estados Unidos, que os organizadores consideran irregular e insuficiente. A marcha partiu pouco despois das 12.00 horas da Alameda e percorreu diferentes rúas do centro de Santiago ata chegar á praza das Pratarías, que quedou ateigada de manifestantes.
Antes do inicio da marcha, a portavoz de Galiza por Palestina, Ánxela Gippini, denunciou o que cualificou como "silenciamento mediático" sobre a situación en Gaza e advertiu de que o xenocidio continúa, ao tempo que puxo o foco no bloqueo da axuda humanitaria e no peche dos pasos fronteirizos por parte de Israel. Pola súa banda, o portavoz de Galiza pola Paz, Rafa Vilar, destacou a elevada participación, que interpretou como unha nova mostra da posición histórica dunha parte da sociedade galega en defensa do pobo palestino, da paz e da liberdade.
Ao remate da manifestación, os convocantes deron lectura ao manifesto e á relación das entidades que apoiaron a mobilización. O documento articúlase arredor de dez reivindicacións, entre as que figuran a esixencia dun alto o fogo efectivo, a entrada sen trabas de axuda humanitaria e unha investigación independente dos crimes de guerra e contra a humanidade denunciados polos organizadores.
O manifesto reclama tamén á Unión Europea a suspensión do Acordo de Asociación e das relacións preferentes con Israel mentres continúen as vulneracións do dereito internacional. Ademais, demanda ao Estado español que rompa as relacións comerciais e militares coa "entidade xenocida", incluídas a venda e o tránsito de armamento, e que impulse medidas de rendición de contas no ámbito internacional.
Entre as peticións figura igualmente a apertura permanente dos pasos fronteirizos, o levantamento do bloqueo e a chegada de axuda humanitaria, auga, combustible e material sanitario e educativo á poboación de Gaza. Os convocantes reclaman tamén unha investigación exhaustiva e independente sobre o xenocidio e os crimes contra a humanidade, así como o apoio ao proceso aberto ante a Corte Internacional de Xustiza.
A mobilización puxo tamén o foco nas actuacións das institucións galegas e españolas. Os organizadores criticaron a Xunta por manter, ao seu xuízo, unha posición afastada do conflito internacional e acusaron o Goberno español de limitarse a "anuncios efectistas" mentres mantén relacións con Israel. Tamén cuestionaron o papel da Unión Europea, á que reprochan manter relacións comerciais e diplomáticas coa parte israelí malia as declaracións públicas sobre o conflito.
No manifesto, as entidades convocantes esixen expresamente á Xunta de Galicia que adopte unha posición clara en defensa da legalidade internacional e que cancele calquera relación institucional, comercial ou de cooperación que manteña directa ou indirectamente con entidades ás que consideran cómplices da ocupación.
A persecución da solidariedade con Palestina foi outro dos asuntos abordados durante a mobilización. Os convocantes denunciaron as denuncias recibidas por persoas solidarias nos últimos meses e rexeitaron que as críticas ao Estado de Israel sexan consideradas delitos de odio. "Ser antisionista non é un delito", sosteñen no manifesto, no que defenden que a oposición ao supremacismo, á limpeza étnica e aos crimes contra a humanidade forma parte, na súa opinión, dos mínimos democráticos.
O documento tamén incorpora unha denuncia da violencia na Cisxordania ocupada e reclama o fin das expulsións forzadas e da expansión dos asentamentos. Segundo os convocantes, os ataques contra a poboación civil palestina non cesaron tras o anuncio do plano de paz de outubro de 2025 e a violencia dos colonos intensificouse na Cisxordania.
Como conclusión, as entidades participantes reivindicaron o dereito do pobo palestino á autodeterminación e ao retorno das persoas refuxiadas. Tamén advertiron contra a posibilidade de que o cesamento do fogo, que cualifican de falso, termine consolidando o bloqueo, a fragmentación territorial e a ocupación.