Noemí Díaz deixa o Goberno local da Coruña e Jesús Celemín regresará como concelleiro
A concelleira de Infraestruturas e Mobilidade da Coruña, Noemí Díaz, presentou este venres a súa renuncia á acta por motivos persoais, poñendo fin á súa etapa no Goberno municipal. A súa saída obrigará á alcaldesa, Inés Rey, a reorganizar parte do executivo local e supón o primeiro cambio entre os concelleiros socialistas nesta lexislatura.
A propia alcaldesa foi a encargada de anunciar a marcha da edil, da que destacou o seu 'compromiso, dedicación incansable e traballo máis aló do deber'. Rey recoñeceu que recibiu a noticia 'con gran pena', definiu a Díaz como 'unha compañeira magnífica' e mostrouse convencida de que poderá regresar á vida pública se así o decide no futuro.
Na carta coa que formalizou a súa renuncia, Noemí Díaz asegurou que foi 'unha honra poder servir á miña cidade durante estes anos como integrante da Corporación municipal'. A edil explica que esta etapa lle permitiu 'aprender e medrar tanto no plano político como no técnico', agradeceu o trato recibido pola cidadanía e polas persoas coas que compartiu responsabilidades e concluíu sinalando que considera que 'é tempo de pechar esta etapa e dar un paso ao lado desde a reflexión e o convencemento persoal'.
O relevo producirase no pleno ordinario do mes de xullo, cando tomará posesión da acta Jesús Celemín, que xa formou parte da Corporación municipal durante o anterior mandato. O concelleiro recuperará a responsabilidade da área de Infraestruturas, mentres que Mobilidade pasará a depender da primeira tenente de alcaldesa, Montse Paz, que suma esta competencia ás que xa exerce en materia de Seguridade Cidadá.
Lucense de nacemento, enxeñeira de Montes de formación e profesora de Xeoloxía no IES Eusebio da Guarda, Noemí Díaz incorporouse ao Goberno municipal tras as eleccións de 2019. Durante este tempo estivo á fronte de diferentes áreas de xestión, primeiro en Medio Ambiente e posteriormente en Infraestruturas e Mobilidade. Ademais, desde 2024 forma parte da executiva nacional do PSdeG encabezada por José Ramón Gómez Besteiro.
A renuncia prodúcese nun momento no que o Concello ten en marcha importantes proxectos de transformación urbana e mobilidade. Inés Rey asegurou que o Goberno municipal continuará traballando 'con absoluta normalidade' e defendeu que a reorganización permitirá manter a continuidade do proxecto iniciado hai sete anos.
A marcha de Noemí Díaz constitúe o primeiro relevo entre os concelleiros socialistas neste mandato. Ata o momento, os únicos cambios rexistrados na Corporación durante esta lexislatura producíranse no grupo municipal do Partido Popular.