O BNG denuncia que a débeda de Galicia alcanza os 13.357 millóns de euros con Rueda na Xunta
A débeda pública de Galicia alcanzou os 13.357 millóns de euros no segundo trimestre deste ano, o seu máximo histórico segundo o último dato publicado polo Banco de España. Ante esta cifra, a portavoz de Facenda do BNG no Parlamento galego, Noa Presas, cuestionou a xestión económica do Goberno de Alfonso Rueda e advertiu das consecuencias que, ao seu xuízo, terá para as próximas lexislaturas.
A deputada nacionalista sinalou que o volume de débeda equivale case a un ano de orzamento da comunidade e criticou que a ratio respecto ao produto interior bruto (PIB) se sitúe no 15 %, fronte á previsión da Xunta de reducila por debaixo do 13 % en 2027.
O BNG rexistrou varias iniciativas no Parlamento para solicitar explicacións ao Goberno galego e reclamar unha auditoría independente sobre a evolución da débeda desde 2009. A formación tamén pide un informe detallado que xustifique o emprego de fondos destinados a imprevistos para pagar xuros e préstamos.
Presas reprochou á Xunta que non aproveitase, segundo o BNG, a oportunidade de negociar co Estado a condonación de 4.000 millóns de euros de débeda. Ademais, vinculou o incremento do endebedamento ao que considera un deterioro dos servizos públicos e á falta de medidas en ámbitos como a vivenda e o encarecemento da vida.
Neste sentido, a parlamentaria lembrou que o PP votou en contra dunha proposta do BNG debatida no último pleno para mobilizar 400 millóns de euros en medidas de apoio a familias e empresas. A formación sinala que a inflación interanual en Galicia chegou ao 4,8 % en agosto, cinco décimas por riba da media estatal, do 4,3 %.
O BNG tamén propón que os próximos orzamentos autonómicos inclúan unha cláusula para garantir que posibles restricións orzamentarias derivadas da situación económica ou de medidas estatais e europeas non reduzan os recursos destinados aos servizos públicos esenciais.