O Consello Regulador da D.O. Rías Baixas cualifica a colleita de 2025 como “moi boa”
O Pleno do Consello Regulador da Denominación de Orixe Rías Baixas acordou cualificar a colleita de 2025 como “moi boa”, unha decisión adoptada o pasado 19 de xuño e que foi dada a coñecer hoxe polo presidente da entidade, Isidoro Serantes Serantes, durante o tradicional encontro anual cos medios de comunicación celebrado en Madrid.
Durante o acto, o secretario xeral do Consello Regulador, Ramón Huidobro, destacou a capacidade de adaptación do sector vitivinícola das Rías Baixas ante os desafíos dos últimos anos. Para iso, recorreu a unha cita de Charles Darwin sobre a adaptación ao cambio, subliñando a resiliencia desenvolvida pola denominación de orixe para afrontar as distintas situacións que se presentan campaña tras campaña.
Pola súa banda, Isidoro Serantes puxo en valor a perseveranza e o compromiso dos profesionais do sector, salientando que a cualificación da colleita constitúe unha das avaliacións máis relevantes para a denominación. Segundo explicou, este proceso implica a participación de técnicos, catadores do panel de expertos do Consello Regulador, prescritores nacionais e internacionais, profesionais externos e consumidores, co obxectivo de garantir unha valoración rigorosa e representativa da calidade dos viños.
O informe técnico elaborado polo Órgano de Control e Certificación do Consello Regulador reflicte que, ata o 31 de maio de 2026, o viño verificado correspondente á colleita de 2025 acadaba os 14,24 millóns de litros, o que supón un incremento do 6,92 % respecto ao mesmo período da campaña anterior. O documento recolle tamén os resultados da análise sensorial e fisicoquímica de 623 mostras pertencentes a 127 adegas.
Este proceso de certificación, acreditado por ENAC, ten como finalidade comprobar a aptitude dos viños antes da súa comercialización. Para iso, o Consello Regulador conta cun panel de expertos integrado por 30 profesionais que avalían cada depósito das 167 adegas inscritas, verificando tanto as súas características fisicoquímicas como organolépticas mediante catas cegas. Este control garante o cumprimento do prego de condicións da denominación e ofrece unha maior seguridade aos consumidores.
En canto ás características dos viños da colleita de 2025, o panel de expertos destaca a súa cor amarelo palla con reflexos verdosos, limpa e brillante, moi representativa dos viños de Rías Baixas. No aspecto aromático sobresaen as notas de mazá, froitas de óso e cítricos, acompañadas de matices herbáceos. En boca presentan unha intensidade media, boa acidez e estrutura equilibrada, cun perfil lixeiro e agradable e unha retronasal marcada por aromas frutais e florais.
O informe técnico define a campaña de 2025 como unha colleita histórica en termos de volume e considera que a perfecta maduración da uva, favorecida polo equilibrio térmico do verán pasado, permitirá obter viños brancos cunha acidez característica da zona, unha expresión frutal moi destacada e unha gran limpeza aromática.
A valoración final tamén ten en conta os resultados acadados polos viños da denominación en concursos nacionais e internacionais, así como as referencias recollidas en guías especializadas e publicacións do sector.
No referente ao ciclo vexetativo, os técnicos explican que 2025 estivo marcado por un inverno e unha primavera especialmente cálidos e húmidos, seguidos dun verán estable. A brotación produciuse de forma temperá, cunha porcentaxe do 90,1 %, mentres que a floración e o callado da uva se desenvolveron con rapidez grazas ás condicións meteorolóxicas favorables.
Porén, a elevada humidade e as temperaturas mínimas rexistradas a comezos do verán favoreceron un forte crecemento da vexetación, o que obrigou a intensificar os traballos de poda e aclarado para mellorar a ventilación dos acios. A vendima iniciou a principios de setembro cun estado sanitario e de maduración óptimos. A uva entrou nas adegas en excelentes condicións de calidade e hixiene, permitindo recoller un total de 47,5 millóns de quilos nunha campaña que os responsables da denominación cualifican de “tranquila e ordenada”.