O Hospital Materno Infantil Teresa Herrera estrea unha iniciativa que combina terapia con animais e realidade virtual
A Fundación María José Jove (FMJJ) e a Fundación Pública Galega de Investigación Biomédica INIBIC puxeron en marcha no Hospital Materno Infantil Teresa Herrera da Coruña un novo programa de intervención asistida con cans destinado a menores en tratamento oncolóxico. A iniciativa, denominada Unindo Pegadas, conta coa colaboración da Fundación Inocente Inocente e desenvólvese xunto ao equipo especializado de IncrescenTO, centro de educación canina, adestramento e terapia asistida con animais.
O proxecto ten como finalidade mellorar o benestar emocional e reducir a ansiedade dos nenos e nenas hospitalizados no centro, pertencente ao Complexo Hospitalario Universitario da Coruña (CHUAC), que afrontan procesos complexos derivados da enfermidade e dos tratamentos.
A iniciativa está dirixida a menores de entre 2 e 15 anos en tratamento oncolóxico, que participarán en sesións deseñadas en función das súas necesidades físicas e emocionais, garantindo en todo momento a súa seguridade, comodidade e benestar. A previsión é que o programa beneficie directamente a arredor de 35 pacientes.
Unindo Pegadas combina a interacción directa cos cans de terapia e cos profesionais especializados co uso de ferramentas tecnolóxicas que permiten preparar a experiencia, expresar as sensacións vividas e prolongar o recordo positivo da intervención.
Antes de cada sesión, os menores utilizan lentes de realidade virtual e/ou tabletas nas que poden visualizar imaxes reais dos cans e das actividades previstas. Este recurso busca anticipar a experiencia, reducir a incerteza e favorecer unha actitude positiva ante a intervención.
A sesión céntrase posteriormente na interacción co can e co profesional mediante actividades adaptadas ao estado físico e emocional de cada menor, priorizando o xogo, o contacto respectuoso e os momentos de calma.
Unha vez rematada a actividade, as tabletas permiten que os nenos e nenas expresen libremente como viviron a experiencia e que aspectos lles resultaron máis agradables, sen presión avaliativa. Ademais, os dispositivos permanecen dispoñibles con xogos tranquilos e contidos personalizados relacionados cos cans e coa sesión para reforzar o recordo positivo e ofrecer un recurso emocional complementario.
A doutora Ana Alas, oncóloga pediátrica do Hospital Materno da Coruña, subliña que “O compoñente lúdico é fundamental na atención hospitalaria dos nenos ingresados”.
Pola súa banda, a responsable da área de Saúde da Fundación María José Jove, Emma Justo, explica que “Con Unindo Pegadas queremos ofrecer aos nenos e nenas que afrontan un tratamento oncolóxico un momento de calma, confianza e alegría dentro da contorna hospitalaria. Este programa reforza o noso compromiso coa humanización da atención sanitaria e co desenvolvemento de iniciativas innovadoras que contribúan a mellorar a calidade de vida dos menores e das súas familias durante un momento especialmente difícil”.
A Fundación María José Jove iniciou en 2016 o seu programa de terapia asistida con animais en contornas hospitalarias no Hospital Materno Infantil Teresa Herrera. Grazas a esta iniciativa, o centro converteuse no primeiro de Galicia e nun dos primeiros de España en permitir a entrada de cans con fins terapéuticos.
Desde entón, a entidade desenvolveu diferentes proxectos neste ámbito, entre eles un estudo piloto iniciado en 2022 con menores de entre 30 meses e 6 anos para analizar os efectos de distintas modalidades de terapia asistida con animais, un programa de actividades lúdico-terapéuticas para nenos hospitalizados de entre 2 e 15 anos, dous programas no Hospital Marítimo de Oza —un na Unidade de Psiquiatría para persoas con enfermidade mental e outro, “Coa túa mascota”, na Unidade de Coidados Paliativos, que permite aos pacientes compartir tempo coas súas propias mascotas— e un programa de intervención asistida con cans no Hospital de Día de Saúde Mental Infanto-Xuvenil dirixido a adolescentes con dificultades emocionais como ansiedade, depresión ou problemas de regulación emocional.
Con esta nova iniciativa na planta de Oncoloxía Pediátrica, a Fundación María José Jove e o INIBIC reforzan a súa aposta pola humanización da asistencia hospitalaria e pola mellora da calidade de vida dos menores durante o seu tratamento.