O Museo de Pontevedra celebra o Día Europeo da Arte Rupestre cunha ollada ao val do Texo
O Museo de Pontevedra súmase á celebración do Día Europeo da Arte Rupestre cunha conferencia da arqueóloga portuguesa Sara Garcês, profesora e investigadora da Universidade Politécnica de Tomar, onde coordina a Cátedra de Arqueoloxía Rupestre. A actividade terá lugar este martes 6 de outubro, ás 19.00 horas, no Edificio Castelao.
A intervención levará por título "A arte rupestre do val do Texo (centro de Portugal) no contexto da arte esquemática da península ibérica: investigación e difusión" e permitirá coñecer as características e o proceso de estudo dun dos principais conxuntos de gravados prehistóricos ao aire libre de Europa.
Durante a conferencia, Sara Garcês situará no contexto da arte esquemática da península ibérica a investigación e a divulgación dos máis de 7.000 gravados prehistóricos conservados nesta zona do centro de Portugal. O conxunto abrangue figuras realizadas desde o Paleolítico ata a Idade de Bronce.
O Complexo de Arte Rupestre do Val do Texo destaca pola elevada concentración de representacións gravadas ao aire libre. A documentación realizada durante a década de 1970 mediante moldes de látex tivo un papel determinante na conservación deste patrimonio, que estaba ameazado pola construción da presa de Fratel.
A secuencia cronolóxica do complexo permite diferenciar cinco fases. Entre elas sobresae un período preesquemático caracterizado pola presenza de fauna silvestre e un extenso ciclo esquemático no que aparecen figuras humanas abstractas, formas xeométricas e representacións de armas.
A distribución dos gravados tamén achega información sobre a relación das comunidades prehistóricas co territorio. Moitas das representacións concéntranse en pasos fluviais e rápidos, coñecidos como cachões, o que pon de manifesto o papel estratéxico do río como espazo de tránsito e de interacción cultural ao longo de miles de anos.
Desde a perspectiva da arte esquemática da península ibérica, o conxunto do Texo constitúe un rexistro relevante para analizar os cambios simbólicos e socioeconómicos experimentados polas sociedades prehistóricas.
A celebración do Día Europeo da Arte Rupestre ten lugar cada 9 de outubro desde 2019. A efeméride foi proclamada polo Consello de Europa e a Comisión Europea para conmemorar o aniversario do recoñecemento pola comunidade científica internacional da autenticidade da arte das Covas de Altamira, en Cantabria.
A encargada de impartir a conferencia conta cunha ampla traxectoria no estudo da arte prehistórica. Sara Garcês é profesora adxunta na Universidade Politécnica de Tomar e coordina tanto a Cátedra de Arqueoloxía Rupestre como o Laboratorio de Arqueoloxía Rupestre do Instituto Terra e Memória. Ademais, é subdirectora e investigadora no Centro de Xeociencias de Portugal.
A súa actividade científica abrangue a autoría e edición de libros, monografías e artigos especializados en arte rupestre, así como a dirección de proxectos de investigación centrados en xacementos ao aire libre e en covas de diferentes países.
Entre as súas áreas de traballo figura a aplicación de novas tecnoloxías ao estudo da arte rupestre, con investigacións relacionadas coa intelixencia artificial, a arqueometría e a documentación dixital en dúas e tres dimensións.
Garcês tamén participa como experta en organismos internacionais vinculados á conservación do patrimonio. Entre outras funcións, intervén na avaliación de candidaturas a Patrimonio Mundial da Unesco para o Consello Internacional de Monumentos e Sitios (ICOMOS) e forma parte do Comité Científico da Ruta Cultural do Consello de Europa PRAT-CARP.
A arqueóloga é ademais fundadora e editora da revista especializada 1902 Committee News Series e directora da publicación científica Antrope.