O PPdeG esixe ao Goberno central a construción da estación de mercadorías de San Cibrao das Viñas
A secretaria xeral do PPdeG, Paula Prado, reclamou ao Goberno central a construción dunha estación de mercadorías ferroviarias en San Cibrao das Viñas, á que definiu como “infraestrutura estratéxica para toda Galicia”, durante un almorzo informativo celebrado con representantes da Asociación de Empresarios do Polígono.
Prado lamentou que o Executivo de Pedro Sánchez “non está nin se lle espera” nesta cuestión e criticou a súa xestión, asegurando que está “máis ocupado coa súa corrupción”. Segundo indicou, a estación de mercadorías beneficiaría aos polígonos empresariais de Seixalbo, San Cibrao, Pereiro de Aguiar, Barreiros e ao Parque Tecnolóxico de Galicia.
A número dous dos populares galegos destacou a importancia do polígono de San Cibrao das Viñas, que cualificou como “absolutamente estratéxico” para toda Galicia, e puxo en valor o seu crecemento, así como o apoio das administracións onde goberna o PP, como a Xunta de Galicia, a Deputación de Ourense e o Concello de San Cibrao das Viñas.
No encontro participaron tamén a alcaldesa de San Cibrao das Viñas, Marta Nóvoa, e o eurodeputado do PPdeG, Adrián Vázquez, xunto con representantes empresariais do polígono.
Marta Nóvoa reivindicou o desenvolvemento do polígono e sinalou que conta con practicamente todos os sectores representados, destacando a súa relevancia económica. Tamén subliñou a necesidade da estación de mercadorías, apuntando que se trata dunha “demanda histórica” vinculada ao transporte e á normativa europea.
Pola súa banda, Adrián Vázquez defendeu a necesidade de reducir a burocracia no ámbito empresarial e asegurou que Europa está a impulsar unha nova etapa centrada na competitividade. Neste sentido, referiuse á proposta do Réxime 28, que permitiría, segundo explicou, crear unha empresa en 48 horas e operar nos 27 Estados membros da Unión Europea.