O PSdeG carga contra o peche de máis de 500 camas hospitalarias no verán e advirte dun colapso nas urxencias
O secretario xeral do PSdeG, José Ramón Gómez Besteiro, advertiu este venres na Coruña de que a redución de persoal sanitario prevista pola Xunta para os meses de verán acabará provocando un incremento da presión nos servizos de urxencias dos hospitais galegos.
Nunha comparecencia realizada no Complexo Hospitalario Universitario da Coruña (Chuac), acompañado pola deputada Silvia Longueira e polo portavoz socialista de Sanidade, Julio Torrado, o líder socialista criticou a decisión do Goberno galego de pechar máis de 500 camas hospitalarias durante a tempada estival, das que preto dun cento corresponden á área sanitaria da Coruña.
Segundo explicou Besteiro, o problema non radica na dispoñibilidade física das camas, senón na falta de profesionais para mantelas operativas. Neste sentido, acusou ao Executivo autonómico de presentar a medida como unha acción de planificación cando, ao seu xuízo, responde unicamente á escaseza de recursos humanos no sistema sanitario público.
O responsable socialista lembrou que Galicia arrastra actualmente listas de espera superiores ás rexistradas antes da pandemia e cuestionou como prevé a Xunta reactivar esas camas no caso de que sexan necesarias. Tamén reclamou explicacións sobre o impacto que terá a redución da actividade asistencial en consultas, probas diagnósticas e intervencións cirúrxicas durante os próximos meses.
Besteiro insistiu en que o verán non supón unha diminución das enfermidades nin das necesidades sanitarias da poboación. Por iso, considerou que a redución de recursos e servizos pode traducirse nunha peor atención aos pacientes e nun aumento das demoras.
Ademais, denunciou que a falta de planificación sanitaria por parte do Goberno galego está a afectar a ámbitos clave como a atención primaria e os servizos de urxencias. Segundo afirmou, o sistema continúa sufrindo unha carencia de médicos, enfermeiras e persoal auxiliar.
Para o líder do PSdeG, a diminución da capacidade hospitalaria acaba derivando unha maior carga asistencial cara a outros servizos, o que provoca máis esperas para os pacientes, atrasos nos ingresos e unha maior presión sobre os profesionais sanitarios. 'A Xunta non está a planificar a sanidade, senón que a está adaptando á falta de medios humanos', concluíu.