O PSdeG leva ao Parlamento unha alternativa ao proxecto da Xunta contra a violencia dixital
O Grupo Socialista rexistrou no Parlamento de Galicia a súa proposición de lei de medidas integrais contra o acoso e a violencia dixital, presentada como alternativa ao proxecto aprobado polo Consello da Xunta en xullo. O texto socialista conta con 40 artigos e incorpora unha perspectiva feminista, fronte aos 26 artigos do proxecto do Goberno galego.
A iniciativa sitúa no centro a protección das mulleres e das nenas e formula unha resposta que inclúe prevención, atención integral, asistencia xurídica, retirada de contidos e reparación do dano. Segundo o PSdeG, con carácter xeral, estes dereitos non quedarían condicionados á presentación previa dunha denuncia nin a reparación dependería dunha resolución xudicial firme.
A presidenta do PSdeG, Carmela Silva, asegurou que “Rueda quere gabarse da primeira lei de España contra a violencia dixital. Nós queremos unha que funcione”. Na súa opinión, as vítimas precisan protección inmediata e non deberían ter que agardar a unha sentenza para recibila.
Un dos principais aspectos da proposta socialista é a resposta ante a difusión de contidos. O texto establece que a Xunta garanta un servizo especializado para axudar as vítimas a solicitar ás plataformas a retirada, o bloqueo, a desindexación ou a limitación dos contidos, así como para facer seguimento destas peticións e preservar as probas.
A deputada Paloma Castro defendeu a necesidade de actuar con rapidez ante este tipo de situacións. “Cada hora que un vídeo íntimo segue circulando é unha hora máis de dano. Por iso propoñemos actuar xa, e facelo sen perder as probas”, sinalou.
A proposición identifica diferentes formas de violencia dixital, entre elas a difusión de imaxes íntimas sen consentimento, os contidos sexuais falsos xerados mediante intelixencia artificial, os deepfakes, a sextorsión, a xeolocalización non consentida, a apropiación de contas, a exposición de datos persoais, a violencia económica dixital e as campañas coordinadas de acoso e descrédito.
A secretaria de Igualdade do PSdeG, Natalia González Beneitez, afirmou que “a violencia dixital contra as mulleres non é virtual. É violencia machista con ferramentas novas e busca o de sempre: controlar, humillar e calar”. Neste sentido, rexeitou que a resposta ante estas situacións pase por que as mulleres pechen as súas contas ou abandonen a súa actividade pública.
No ámbito educativo, o texto propón introducir a prevención en todas as etapas, incluída a universidade, con contidos relacionados co consentimento, a pornografía, a captación sexual e a intelixencia artificial. Tamén contempla protocolos nos centros educativos para detectar situacións de violencia, habilitar canles seguras e actuar con rapidez evitando a revitimización.
A proposta incorpora ademais os Centros de Información ás Mulleres e os centros de crise 24 horas nunha resposta coordinada, co obxectivo de facilitar o acceso aos diferentes recursos sen obrigar as vítimas a repetir o seu relato en cada servizo.
O PSdeG reclama unha atención específica para mulleres maiores, residentes no rural, con discapacidade, migrantes ou en situación de dependencia. Tamén presta especial atención ás mulleres con presenza pública, política, sindical ou profesional, pola súa exposición a campañas de acoso e silenciamento.
“Cando atacan unha muller nas redes para que cale, a agresión é contra ela, pero quen perde é a democracia”, afirmou Carmela Silva.
A proposición tamén establece medidas relacionadas coa aplicación da futura norma no ámbito municipal. O texto sinala que as novas funcións dos concellos deberán ir acompañadas dos recursos económicos e técnicos necesarios e, cando sexa preciso, de persoal.
Entre os mecanismos de seguimento previstos figuran a dotación orzamentaria suficiente, a elaboración nun prazo máximo de seis meses dun Plan galego contra a violencia dixital contra as mulleres, un calendario de implantación, un informe anual e unha avaliación integral cada tres anos que deberá remitirse ao Parlamento.
A iniciativa terá que superar agora o trámite de toma en consideración no Pleno do Parlamento de Galicia. Paloma Castro asegurou que “o PP ten maioría para votala en contra. O que xa non poderá dicir é que non había alternativa”.