O PSdeG pide máis investigación sobre a ELA e coidadores especializados para mellorar a atención
A portavoz de Política Social do PSdeG, Silvia Longueira, reclamoulle á Xunta un maior impulso á investigación da Esclerose Lateral Amiotrófica (ELA) e a mellora dos recursos asistenciais para as persoas afectadas por esta enfermidade.
Durante a súa intervención na comisión de Sanidade do Parlamento, Longueira puxo o foco na necesidade de avanzar no tratamento dunha doenza “que está aquí para quedarse” e para a que a investigación segue sendo clave.
Coidadores especializados
A deputada socialista trasladou as demandas das persoas enfermas e das súas familias, que reclaman unha atención máis especializada, especialmente no que respecta aos coidados.
Segundo explicou, a ELA require coñecementos específicos para o manexo da maquinaria que utilizan os pacientes, así como formación concreta para as persoas encargadas da súa atención.
Neste sentido, considerou que reforzar a especialización dos coidadores suporía “un cambio pequeno” para a Administración, pero “unha axuda grandísima” para mellorar a calidade de vida dos doentes.
Espazos adaptados nas residencias
Longueira tamén propuxo a creación de espazos específicos dentro das residencias ou incluso pequenas unidades especializadas para atender ás persoas con ELA, especialmente nas fases máis avanzadas da enfermidade.
A parlamentaria defendeu que estes recursos permitirían ofrecer unha atención máis axeitada e digna, adaptada ás necesidades concretas dos pacientes.
Chamamento á Xunta
A responsable socialista instou ao Goberno galego a dar un paso adiante tanto na investigación como na dotación de recursos asistenciais, lembrando que o Goberno central xa puxo en marcha unha lei específica e medidas de apoio para este colectivo.
“O que pedimos é vontade política para avanzar nunha atención máis xusta e especializada”, concluíu.