O Rabazal convértese no epicentro das letras coa quinta edición da Feira da Cultura EnCaMiño en Miño
A vila de Miño prepárase para volver converterse na capital cultural e literaria das Mariñas durante catro xornadas. A Pista Municipal do Rabazal e o Centro Social A Rúa acollerán do 16 ao 19 de xullo a quinta edición da Feira da Cultura EnCaMiño, unha cita xa consolidada no calendario estival galego que reunirá a máis dun cento de creadores e creadoras.
O evento contará cunha ampla programación pensada para todos os públicos, con faladoiros literarios, obradoiros, roteiros pola natureza, espectáculos infantís, proxeccións de curtametraxes, micro aberto de poesía, sinaturas de exemplares e un mercado cultural con presenza de editoriais, librarías e ilustradores.
Un dos grandes atractivos será o Mercado Cultural, onde o público poderá mercar exemplares e participar nas sesións de sinaturas con máis de medio cento de autores e autoras. A proposta tamén reforzará a conexión entre literatura e territorio con roteiros literarios e poéticos por espazos naturais do municipio.
A feira chega ademais nun momento de crecemento tras o éxito da pasada edición, na que superou as 3.000 persoas participantes e os 3.000 exemplares vendidos, triplicando a asistencia rexistrada en 2024. Estes datos consolidan EnCaMiño como unha das citas culturais de referencia na comarca.
A entrada será libre e gratuíta. O horario será de 17.00 a 21.00 horas o xoves e o venres, e de 11.00 a 15.00 horas e de 17.00 a 21.00 horas o sábado e o domingo. As inscricións para obradoiros e roteiros poden realizarse a través do correo minocultural@gmail.com.