O sorteo de San Roque elixirá este xoves as súas persoas representantes en Betanzos
As festas de San Roque 2026 darán este xoves un novo paso en Betanzos coa elección das persoas que exercerán como representantes das celebracións patronais. O Concello celebrará o sorteo público entre as solicitudes presentadas ás 13.00 horas no Salón Azul, nun acto aberto ao que poderá asistir calquera persoa interesada.
O procedemento chega despois de que o Concello abrira un prazo de inscrición para que a veciñanza puidese presentar a súa candidatura. A convocatoria estaba dirixida a persoas empadroadas en Betanzos que non desempeñasen este papel en edicións anteriores. O modelo mantén a fórmula posta en marcha nos últimos anos, coa que a figura das persoas representantes substitúe á tradicional raíña das festas e busca unha participación máis aberta e inclusiva.
A elección realizarase mediante sorteo no caso de que haxa varias candidaturas admitidas. As bases establecen dúas categorías: representante maior, para persoas nacidas nos anos 2007 e 2008, e representante infantil, para persoas nacidas en 2017 e 2018. No caso das persoas menores de idade, é imprescindible contar coa autorización dos pais, nais ou titores legais.
As persoas escollidas participarán nos actos centrais das festas patronais de San Roque, especialmente nos desfiles dos días 14, 15 e 16 de agosto. Poderán elixir a súa vestimenta e as cores coas que participarán, sempre dentro dun contexto acorde coa celebración, e tamén a composición da súa comitiva, cun máximo de 24 integrantes.
O resultado do sorteo será comunicado posteriormente ás persoas participantes. Con este trámite, Betanzos avanza na organización dunhas festas que cada ano mobilizan á veciñanza e atraen numerosos visitantes arredor dun dos calendarios festivos máis recoñecidos da comarca.