O Supremo rexeita o recurso do Goberno e mantén a suspensión do voto para os nacionalizados pola lei de netos
O Tribunal Supremo rexeitou o recurso do Goberno español contra a suspensión cautelar do voto das persoas que obtiveron a nacionalidade a través da chamada lei de netos e mantén a medida para as eleccións xerais do vindeiro 29 de novembro. A excepción será para quen poida acreditar que os seus antepasados sufriron o exilio por razóns políticas, ideolóxicas, de crenza ou de orientación e identidade sexual.
A Sala do Contencioso-Administrativo considera que persisten os motivos que levaron a suspender as inscricións no Censo Electoral de Residentes Ausentes no Estranxeiro (CERA) e os efectos electorais das que xa se realizaron. O tribunal sostén que a Administración non achegou información suficiente para comprobar o cumprimento das condicións legais nos expedientes de nacionalización.
Os maxistrados rexeitan que a falta de tempo para revisar os expedientes xustifique o incumprimento da orde xudicial e atribúen á Administración e á Oficina do Censo Electoral a responsabilidade de acreditar o grao de cumprimento da resolución.
O Supremo considera prioritario garantir a exactitude, a transparencia e a regularidade do censo electoral, ao entender que as dúbidas sobre a súa composición poden comprometer a lexitimidade democrática dos representantes elixidos. Segundo o tribunal, a medida debe prevalecer sobre o dereito ao voto das persoas afectadas mentres non se aclaren as condicións das súas inscricións.
A resolución tamén ordena publicar a decisión no Boletín Oficial do Estado e trasladala aos rexistros consulares que tramitaron os expedientes. Ademais, permite que as persoas afectadas se personen no procedemento e presenten alegacións sobre as medidas cautelares.
Porén, a maxistrada Alicia Millán emitiu un voto particular contrario á suspensión. Ao seu xuízo, o adianto electoral modifica substancialmente as circunstancias iniciais e obriga a ponderar de novo a protección do censo co dereito fundamental ao sufraxio activo, especialmente ante a proximidade dunha convocatoria electoral concreta.