Preto dun millón de euros para mellorar centros sociais da provincia de A Coruña
A Deputación da Coruña destinará preto de un millón de euros a 64 entidades sociais da provincia para cofinanciar investimentos en servizos sociais. As axudas, publicadas na súa resolución definitiva, están dirixidas a mellorar instalacións e recursos de entidades que traballan con colectivos vulnerables, como menores en risco de exclusión, persoas maiores, persoas con discapacidade ou usuarios de programas de inserción.
A convocatoria permitirá sufragar actuacións moi diversas, desde reformas en centros de día, residencias ou espazos ocupacionais ata a adaptación de baños, melloras de accesibilidade, renovación de fachadas, illamentos térmicos ou ampliación de accesos. Tamén se inclúe a adquisición de material informático, mobiliario, equipamento para programas de atención e cociñas industriais.
O obxectivo desta liña é reforzar o traballo do terceiro sector e garantir que as entidades dispoñan de espazos máis seguros, adaptados e funcionais para atender ás persoas usuarias. A maior parte das actuacións están vinculadas a necesidades concretas do día a día, como mellorar dependencias residenciais, modernizar centros de atención, renovar equipamento básico ou facilitar a continuidade de programas sociais.
As achegas chegarán a entidades que traballan en ámbitos como a atención á infancia, a dependencia, a discapacidade, a saúde mental, o alzhéimer, a inclusión social, as drogodependencias, a inserción laboral ou o apoio a persoas migrantes. A distribución abrangue diferentes comarcas da provincia, o que permite estender o impacto das axudas tanto ás áreas urbanas como a concellos de menor tamaño.
Entre os proxectos financiados figuran melloras en centros residenciais, adquisición de equipamento tecnolóxico para servizos de respiro familiar, adaptación de instalacións en centros ocupacionais, renovación de cociñas, reparacións en centros de atención social, investimentos en vivendas protexidas e actuacións en escolas infantís.
A deputada de Política Social, Mar García Vidal, destacou que estas axudas buscan que as entidades conten con instalacións modernas e adaptadas para mellorar a atención. Tamén subliñou que a colaboración co tecido social permite chegar a colectivos e necesidades ás que as administracións non sempre poden responder de maneira directa.
Con esta resolución, a Deputación reforza unha liña de apoio pensada para investimentos materiais, pero cun impacto directo na calidade dos servizos que reciben milleiros de persoas na provincia.