Roberto Lolo: “Sarria é o corazón da maxia, porque o festival faise con máis corazón que capital”
Jessica Fernández
O Festival Internacional de Maxia Vila de Sarria volverá encher de ilusión a vila do 20 ao 23 de agosto. Tras unha vixésima edición moi especial celebrada o pasado ano, que se prolongou durante sete días para conmemorar as dúas décadas de historia do certame, a cita recupera este verán o seu formato habitual de catro xornadas. Farao coa participación de 17 artistas, entre eles o propio Roberto Lolo, e cunha edición especialmente emotiva, xa que estará dedicada á memoria do seu pai, Herminio Lolo, falecido recentemente.
A dedicatoria supón un recoñecemento a unha persoa que estivo moi ligada ao festival desde os seus comezos. Herminio apoiou a Roberto desde que descubriu a maxia sendo un neno e continuou facéndoo cando decidiu converter aquela afección na súa profesión. "Cando decidín ser artista e me centrei máis nisto, sempre tiven o seu apoio incondicional. Xamais me dixeron outra cousa que non intentase facer o que me fixese feliz", lembra o promotor do festival.
Pero o seu papel foi moito máis alá do ámbito familiar. Cociñeiro de profesión, Herminio era o encargado de preparar a comida para todos os magos que participaban nas primeiras edicións do certame, unhas reunións que, segundo explica Roberto, acabaron definindo a esencia do festival. "O motor do festival foi o cariño que sentían na miña casa. O meu pai cociñaba para todos os magos ata o ano da COVID, polo que neses anos empezou a construírse unha amizade entre compañeiros que terminou converténdose nunha familia".
Ese ambiente familiar, sostén, foi unha das claves para que numerosos artistas quixesen regresar ano tras ano a Sarria. "O cariño que os meus pais lles ofrecían, eles devolvíannolo querendo estar aquí. Nunca foi unha cuestión de diñeiro". Unha mostra do afecto que espertaba Herminio entre os ilusionistas resúmea unha dedicatoria que o mago Noel Galán escribiu nun dos seus discos: "Para o pai de todos os magos".
Por iso, Roberto prefire definir o festival doutra maneira. "Non me gusta cando din que Sarria é a capital mundial da maxia. Para min, Sarria é o corazón da maxia porque este festival faise con máis corazón que capital".
A XXI EDICIÓN DO FESTIVAL
Nesta XXI edición, ademais da homenaxe a Herminio Lolo, o público atopará varias novidades. Unha das máis destacadas será o primeiro espectáculo de maxia para bebés que acolle o festival. Estará protagonizado por Mino e Arthur e celebrarase o domingo pola mañá na Casa da Cultura. Ademais, a organización modificou varias localizacións dos espectáculos e reforzou a programación dirixida ao público infantil.
"Vou intentar centrarme moito nos pequenos porque, aínda que vai haber espectáculos para adultos e familiares, quero que os nenos desfruten da maxia. Ao final, o futuro son os nenos", explica Roberto, que recoñece que el mesmo medrou rodeado de maxia. "Eu crieime vendo maxia e para min é das cousas que máis feliz me fan no mundo. Ver felices aos nenos fará que o día de mañá poidan seguir desfrutando do festival".
A programación reunirá este ano a 17 artistas e combinará nomes habituais con outros que actuarán por primeira vez en Sarria. Entre as incorporacións destacan Jandro, Joaquín Matas e o dúo Mino e Arthur, mentres que regresarán artistas como Samuel Moreno, Sara Rodríguez ou Román García, a quen Roberto considera o seu mentor e que estivo presente durante os 21 anos de historia do festival.
"A xente vai ver artistas incribles que nunca viron, con disciplinas fabulosas tanto para nenos como para adultos. Creo que lles vai gustar", afirma. A selección dos participantes responde, explica, a un traballo de seguimento durante todo o ano. "Intento combinar artistas que destacasen, outros que teñan números que me chamen a atención e, sobre todo, gústame a autenticidade". Esa filosofía tamén o leva a dar oportunidades a novos talentos, como Borjini, un neno de 11 anos que este ano formará parte do cartel.
A relación cos artistas é outro dos trazos que, ao xuízo de Roberto, distingue o festival. Lembra, por exemplo, que nunha ocasión Jorge Blass quixo participar nun espectáculo infantil, aínda que non estaba previsto no programa e puido facelo con total liberdade. "Dóulles confianza para que fagan o que queiran. Aquí somos todos iguais. Creo que en Sarria conseguimos crear unha familia de artistas que vai en comuñón co público". Ese compromiso e proximidade vese nos festivais: "Aquí hai que estar disposto a facer moitas cousas e, sobre todo, desfrutar e ser próximo. A xente de Sarria valora moito iso. Podes traer grandes estrelas da maxia e despois velas paseando polo Malecón falando con calquera", sinala.
O VALOR DO FESTIVAL
Co paso dos anos, o festival converteuse ademais nun importante reclamo turístico para a vila. "Moita xente prepara as súas vacacións para estar aquí durante o festival", afirma. Esa repercusión tamén a percibe cando actúa noutros lugares. "Pasoume ir actuar fóra e que a xente coñeza o festival de Sarria. Valoran moito o que facemos aquí".
Todo iso, engade, foi posible grazas ao traballo dun amplo equipo e ao apoio das administracións. "É un festival moi grande con moi poucos medios, contando co apoio do Concello de Sarria, da Xunta e este ano tamén da Deputación de Lugo".
Despois de vinte e unha edicións, Roberto Lolo non pensa en poñer punto final ao proxecto que comezou hai máis de dúas décadas. O seu obxectivo, asegura, segue sendo o mesmo: "Seguir facendo este festival todos os anos que poida. Ata que a saúde mo permita", conclúe.