Santiago cuestiona o PIA do parque empresarial de Lavacolla e pide limitar os usos comerciais
O Concello de Santiago presentou alegacións ao Proxecto de Interese Autonómico (PIA) previsto para desenvolver o futuro parque empresarial de Lavacolla e cuestiona varios dos aspectos fundamentais recollidos no documento aprobado inicialmente pola Xunta en xuño. Entre as principais demandas municipais figura a limitación dos usos comerciais, a mellora dos accesos e a revisión das conexións coas redes de servizos.
O concelleiro de Urbanismo, Iago Lestegás, explicou que o Goberno local considera especialmente preocupante que as dúas ordenanzas previstas para o ámbito, a industrial e a industrial-terciaria, permitan a implantación de actividades comerciais. Segundo os datos do propio PIA, a primeira afecta a unha superficie edificable de 83.105 metros cadrados, mentres que a segunda abrangue 165.830 metros cadrados.
Para o Concello, esta regulación podería facer posible que todas as parcelas lucrativas do futuro parque acabasen destinadas a actividades comerciais sen limitacións. Lestegás advertiu de que isto suporía modificar na práctica o carácter industrial que o PXOM establece para este ámbito.
As alegacións municipais propoñen, por iso, que o futuro parque só permita aqueles usos comerciais vinculados directamente coa actividade industrial desenvolvida en cada parcela ou aqueles que, polas súas características, resulte máis conveniente situar fóra do núcleo urbano. O Concello pon como exemplo os concesionarios de automóbiles.
Lestegás defendeu que os parques empresariais deben reservarse para actividades incompatibles coa presenza de vivendas e alertou do impacto que pode ter a concentración de comercio nas zonas periféricas sobre os establecementos tradicionais dos barrios. Neste sentido, insistiu en que a protección do comercio de proximidade debe formar parte tamén da planificación urbanística.
Outro dos reparos formulados polo Concello afecta ao propio ámbito territorial do PIA. O proxecto abrangue 561.567 metros cadrados e coincide en boa medida co sector SUND-32 previsto no PXOM para uso industrial, aínda que introduce modificacións. O documento exclúe terreos de dominio público estatal próximos á A-54 e, ao mesmo tempo, incorpora parcelas clasificadas como solo rústico de especial protección forestal sen que, segundo o Concello, exista unha xustificación suficiente.
O Goberno local tamén reclama que se explique de maneira expresa por que se optou polo sistema de expropiación para executar a actuación, fronte ás demais fórmulas previstas pola normativa urbanística. Para o Concello, a elección deste mecanismo debe estar debidamente motivada.
As conexións cos servizos básicos constitúen outro dos puntos das alegacións. Santiago pide revisar as solucións previstas para o abastecemento de auga, o saneamento e a subministración eléctrica, entre outras infraestruturas. Ademais, reclama a incorporación de sistemas de drenaxe sostible que permitan favorecer a infiltración da auga da choiva e mellorar a xestión do ciclo hídrico.
Especial atención reciben tamén os accesos ao futuro parque empresarial. O Concello considera que as solucións propostas non están suficientemente resoltas e poden xerar afeccións sobre vías municipais existentes. O acceso norte está previsto a través da AC-250 ata un punto situado a uns 300 metros ao norte da rotonda da A-54, desde onde se aproveitarían e ampliarían vías municipais ata acadar unha sección de 18 metros.
Esta conexión obrigaría ademais a atravesar a A-54 mediante un paso inferior de dez metros de ancho. Lestegás considera que esta solución pode resultar insuficiente para dar servizo a un parque empresarial de máis de medio millón de metros cadrados e reclama estudar alternativas para mellorar a entrada pola zona norte.
O impacto visual e paisaxístico é outro dos elementos que o Concello considera insuficientemente abordados. As alegacións sinalan que o documento inicial non inclúe un estudo topográfico que permita determinar a visibilidade do futuro parque desde o Camiño Francés. Tamén cuestionan as dimensións das franxas verdes previstas no perímetro e consideran que non serían suficientes para reducir o impacto visual da actuación.
A administración municipal reclama igualmente unha identificación e valoración dos elementos naturais existentes no ámbito, entre eles pozos, mananciais, brañas, regos, regatos, masas arbóreas e vexetación de ribeira.
Dúbidas sobre a utilización dun PIA
Máis alá das características concretas do proxecto, o Concello cuestiona tamén que o instrumento escollido pola Xunta para desenvolver o parque sexa un Proxecto de Interese Autonómico. Lestegás defendeu que esta figura debería quedar reservada para actuacións de interese autonómico claro e para proxectos singulares, urxentes ou extraordinarios.
O concelleiro puxo como exemplo o PIA vinculado ao Hospital Clínico, destinado á construción dun aparcadoiro e á reorganización dos accesos ao complexo sanitario. Ao seu xuízo, o caso de Lavacolla non presenta as mesmas características e podería tramitarse mediante un plan parcial aprobado polo propio Concello.
O responsable municipal de Urbanismo advertiu de que a utilización dun PIA establece un procedemento especial no que os concellos ven limitada a súa capacidade de decisión sobre cuestións que afectan directamente ao modelo urbano. Neste caso, lembrou, a localización das actividades comerciais ten unha incidencia directa na configuración futura de Santiago.
Por este motivo, o Concello reclama á Xunta que teña en conta a súa posición durante a tramitación do proxecto e defende que a planificación do futuro parque empresarial debe encaixar co modelo de cidade establecido no planeamento municipal.