Turismo

Mantense a prohibición de discotecas e salas de festas, mentres que outros establecementos, como pubs, karaokes e cafés-concerto, estarán suxeitos a unha avaliación técnica

O Concello de Santiago aprobou provisionalmente a modificación do Plan especial de protección e rehabilitación da Cidade Histórica, que busca reforzar o uso residencial, protexer o comercio de proximidade e equilibrar as actividades dirixidas aos veciños e aos turistas. O documento deberá recibir agora o informe vinculante da Dirección Xeral de Urbanismo antes de someterse á aprobación definitiva do Pleno municipal.

O concelleiro de Urbanismo, Vivenda e Cidade Histórica, Iago Lestegás, explicou que a nova normativa actualiza a regulación de usos vixente desde 1997 e responde á necesidade de frear a especialización turística do casco histórico. Para iso, prohíbense as tendas de souvenirs e de produtos típicos en todas as ordenanzas, agás nas zonas de Tecidos Históricos Renovados e Rueiros. Tamén se restrinxen os establecementos automáticos, como consigna de equipaxes e lavanderías, no recinto intramuros.

En canto ao ocio nocturno, mantense a prohibición de discotecas e salas de festas, mentres que outros establecementos, como pubs, karaokes e cafés-concerto, estarán suxeitos a unha avaliación técnica do seu impacto e á aplicación de posibles medidas correctoras. Tamén continuará a prohibición de casinos, salas de bingo e tendas de apostas.

A modificación introduce cambios na regulación das vivendas para facilitar a súa adaptación ás necesidades actuais. Permitirase dividir ou agrupar inmobles sempre que as vivendas resultantes cumpran as condicións mínimas de habitabilidade e sexan exteriores, sen alterar a estrutura parcelaria protexida nin os elementos catalogados. Así mesmo, mantense a prohibición de implantar novos establecementos de hospedaxe turística.

O documento tamén contempla a posibilidade de crear vivendas sociais en determinados equipamentos públicos asistenciais e incorpora ao uso residencial os aloxamentos dotacionais, como vivendas tuteladas, colaborativas ou compartidas para mozos.

Por outra banda, amplíanse os usos permitidos en determinados edificios singulares e equipamentos eclesiásticos para facilitar o seu aproveitamento. Entre as posibilidades inclúese a creación de residencias universitarias, sempre que estean vinculadas a entidades relixiosas, públicas ou do terceiro sector e que non supoñan unha redución do parque de vivendas.

Lestegás destacou que o Concello desenvolveu un proceso participativo con dous períodos de información pública, máis de 10.000 notificacións a titulares de inmobles e reunións con representantes das asociacións veciñais da cidade histórica.

A reforma comezou a tramitarse en xuño de 2024 e foi aprobada inicialmente en xuño de 2025. Segundo o concelleiro, o obxectivo é protexer a identidade da cidade histórica, favorecer a vida dos seus residentes e garantir unha actividade económica compatible coa conservación do seu patrimonio.