SATSE reclama reforzos nos centros de saúde ante a próxima campaña da gripe e da covid
O Sindicato de Enfermaría SATSE reclamou aos servizos de saúde que reforcen os cadros de persoal de Enfermaría nos centros de Atención Primaria ante o inicio da próxima campaña de vacinación contra a gripe e a covid-19. A organización sindical advirte de que as actuais cadros de enfermeiras e enfermeiros están xa moi sobrecargados de traballo e alerta de que, se non se incorporan máis profesionais, poderían repetirse os incidentes, demoras e dificultades que se producen cada ano.
Ante o inicio dunha nova campaña de vacinación, prevista no conxunto das comunidades autónomas a finais de setembro e durante o mes de outubro, SATSE pide ás administracións sanitarias que non cometan “o mesmo erro de todos os anos” e anticipen as necesidades de persoal para garantir que o proceso se desenvolva con normalidade.
O sindicato lembra que a campaña non se limita ao acto de administrar as vacinas. As enfermeiras de Atención Primaria tamén deben realizar previamente labores de prevención e sensibilización, ademais de rexistrar as vacinacións, detectar posibles efectos adversos e facer o seguimento das persoas usuarias cando sexa necesario.
SATSE denuncia que as enfermeiras de Atención Primaria teñen que atender en ocasións ata 2.000 persoas, e mesmo máis, cando o cupo máximo non debería superar as 1.500. Unha situación que, segundo a organización, se agrava durante as campañas de vacinación, cando deben dedicar unha parte importante do seu tempo a informar, sensibilizar e vacinar miles de persoas ao longo de varias semanas.
A organización sindical advirte de que a falta de persoal suficiente ralentiza o proceso e provoca dificultades para que toda a poboación poida acceder á vacinación “en tempo e forma”, especialmente nas zonas rurais. Por este motivo, reclama ás consellerías de Sanidade que garantan os recursos necesarios para que as campañas se desenvolvan de maneira áxil, eficiente e eficaz.
SATSE subliña que garantir as coberturas previstas na Estratexia Nacional de Vacinación require que as enfermeiras dispoñan do tempo necesario para completar todo o proceso. Os obxectivos establecidos chegan ao 75 % no caso das persoas maiores e ao 60 % no das mulleres embarazadas e dos nenos e nenas de ata 59 meses.
“Se queremos alcanzar as porcentaxes de cobertura establecidas na estratexia nacional de vacinación, e que chegan ao 75 por cento no caso dos maiores e ao 60 por cento no das mulleres embarazadas e nenos/as ata os 59 meses, debemos en todo momento facilitar e garantir o tempo que estas enfermeiras teñen destinado ao proceso integral de vacinación”, sinala o sindicato.
Para SATSE, a orixe do problema segue sendo o déficit estrutural de profesionais de Enfermaría que afecta todos os servizos de saúde e que require, na súa opinión, unha solución “ambiciosa” e conxunta que permita responder ás necesidades da sociedade e do sistema sanitario tanto no presente como no futuro.
Neste sentido, o sindicato lembra que segue pendente de aprobación a Lei de ratios de Enfermaría, impulsada por SATSE a través dunha Iniciativa Lexislativa Popular, que pretende garantir unha dotación adecuada e segura destas profesionais nos centros de saúde, hospitais e centros sociosanitarios, incluídas as residencias de maiores.
As campañas tamén restan tempo a outras tarefas sanitarias
SATSE alerta ademais de que a necesidade de priorizar o proceso de vacinación durante varias semanas pode impedir que as enfermeiras e enfermeiros desenvolvan outras actuacións fundamentais de prevención e promoción da saúde.
Entre estas tarefas están a atención e o seguimento de pacientes crónicos e pluripatolóxicos, tanto nos centros sanitarios como nos seus domicilios, así como outras intervencións propias da Atención Primaria.
O sindicato considera que as dificultades que se repiten durante as campañas de vacinación son “un exemplo máis dos erros recorrentes” que, ao seu xuízo, cometen cada ano as diferentes consellerías de Sanidade, a pesar de coñecer con antelación as necesidades que se van producir.
SATSE relaciona esta falta de previsión tamén coas situacións de saturación e colapso que se rexistran meses despois nos servizos sanitarios como consecuencia do incremento da incidencia da gripe e doutros virus respiratorios.
Por todo iso, o sindicato insiste na necesidade de reforzar os equipos de Enfermaría antes do inicio da campaña para evitar que a falta de profesionais termine repercutindo tanto na atención á cidadanía como nas condicións de traballo das propias enfermeiras e enfermeiros.