Vigo acolle a cuarta edición de Musicav, un festival que medra como referencia do jazz e a música clásica en Galicia
O festival Música con V de Vigo (Musicav 2026) presentou este venres en Vigo o programa da súa cuarta edición, nun acto no que participaron a delegada territorial da Xunta en Vigo, Ana Ortiz, e o director xeral de Cultura, Anxo M. Lorenzo. Ambos destacaron o crecemento experimentado polo certame desde a súa creación e a súa consolidación como unha cita destacada do panorama cultural de Vigo e de Galicia.
A presentación contou tamén coa presenza dos directores artísticos do festival, Javier Ferreiro e Rosanna Ojea, e da directora de Comunicación e Marketing de El Corte Inglés, Fuencisla Cid. Durante o acto puxéronse en valor a calidade da programación e os prezos accesibles para todos os públicos.
A cuarta edición de Musicav desenvolverase entre o 6 e o 27 de outubro no Teatro Afundación e no Vitruvia Club, cun día máis de actuacións respecto das edicións anteriores. O festival mantén a súa fórmula de combinar música clásica, jazz e cine, buscando achegar propostas musicais de calidade a un público amplo.
Ana Ortiz salientou o apoio do Goberno galego a un ciclo que, segundo explicou, “aposta por devolver a Vigo ao lugar de referencia cultural que ocupaba hai anos”. A delegada territorial animou a cidadanía a asistir a un festival que “conta cunha excelente oferta” clásica e de jazz. “Na nosa cidade necesitamos a moita xente como os organizadores de MusicaV para ter eventos de tanta calidade”, apuntou.
Pola súa banda, Anxo M. Lorenzo destacou “o crecemento e a evolución dun festival que aínda está a dar os seus primeiros pasos” e sinalou que, “a pesar de ser a cuarta edición xa é unha cita imprescindible” para a cultura en Vigo e no resto de Galicia.
Durante o acto de presentación tamén se destacou que Musicav demostrou, tras as súas primeiras edicións, que “é posible achegar a música de calidade a un público xeral sen necesidade de coñecementos previos”.
Seis propostas musicais entre outubro e novembro
A programación comezará o 6 de outubro no Auditorio Afundación coa actuación de Savoy Club Big Band, dirixida por José Somoza, que presentará a súa particular Antoloxía do bolero.
O 8 de outubro, o Vitruvia Club acollerá un recital de piano de Abe Rábade, mentres que o 13 de outubro será a quenda de Sumrrá Trío, cun concerto no Auditorio Afundación.
A programación continuará o 21 de outubro coa actuación de Caspervek Ensemble, que ofrecerá no Auditorio Afundación música en directo durante a proxección de Metrópolis, de Fritz Lang.
O 22 de outubro, o Vitruvia Club recibirá a Julia Perminova Trío e, finalmente, o 27 de outubro, Vitruvia Art Strings ft David Linx pechará esta cuarta edición no Auditorio Afundación.