Vigo converterase desde hoxe no epicentro do Día das Forzas Armadas cun amplo programa de actos
A cidade de Vigo será escenario desde este martes e ata o vindeiro domingo dos actos oficiais do Día das Forzas Armadas 2026, unha programación que incluirá exposicións, demostracións militares, concertos e desfiles coa participación dos diferentes corpos do Exército e a presenza dos Reis de España no acto central.
As actividades arrancarán hoxe, martes, cunha exposición estática de vehículos, medios e material militar no porto vigués, onde cidadanía e visitantes poderán coñecer de preto os recursos empregados polos distintos exércitos e corpos de seguridade.
O mércores continuará a programación cunha demostración de capacidades operativas nas instalacións deportivas próximas ao estadio de Balaídos. No exercicio participarán efectivos do Exército de Terra, a Armada, o Exército do Aire e do Espazo, a Garda Real, a Unidade Militar de Emerxencias e a Garda Civil.
Xa o xoves, a Porta do Sol acollerá un encontro musical no que tomarán parte sete unidades de música militar e institucional, reunindo a preto de 280 músicos nun concerto aberto ao público.
Un dos momentos máis destacados chegará o venres coa revista naval presidida polo rei Felipe VI na ría de Vigo, na que participarán embarcacións da Armada e da Garda Civil. Esa mesma tarde, a praia de Samil será o escenario dunha exhibición dinámica con manobras aéreas e marítimas.
O acto central celebrarase o sábado cun gran desfile militar ao longo da avenida de Samil, tamén presidido polos Reis. Máis de 3.700 efectivos pertencentes á Garda Real, Exército de Terra, Armada, Exército do Aire e do Espazo, Garda Civil e Unidade Militar de Emerxencias participarán nun percorrido que contará tanto con desfile terrestre como aéreo.
O Día das Forzas Armadas celébrase cada ano nun punto diferente do Estado co obxectivo de achegar o labor das Forzas Armadas á sociedade e render homenaxe aos corpos militares e de emerxencias. A edición de 2025 tivo lugar en Santa Cruz de Tenerife.