Vigo converterase no epicentro do sector espacial coa cuarta edición de New Space España
Vigo será sede os días 24 e 25 de setembro da cuarta edición de New Space España, un encontro que reunirá a máis de 120 empresas e preto de 300 profesionais vinculados á industria espacial tanto a nivel estatal como europeo. O congreso desenvolverase na sede de Afundación da cidade olívica e consolidará a Galicia como un dos territorios emerxentes dentro deste ámbito tecnolóxico.
A presentación oficial do evento celebrouse este mércores coa participación de representantes empresariais, institucionais e académicos relacionados co sector aeroespacial. O conselleiro delegado de Alén Space, Guillermo Lamelas, destacou a importancia deste foro para favorecer o contacto entre compañías, entidades e profesionais, nun contexto no que a industria demanda cada vez máis espazos de colaboración e intercambio de coñecemento.
Baixo o lema “Autonomía estratéxica desde o espazo”, a nova edición abordará o papel crecente da tecnoloxía espacial na sociedade actual e na competitividade dos países e das empresas. Segundo explicou a organización, o programa incluirá tamén novas áreas orientadas ao talento emerxente e á presentación de proxectos innovadores impulsados por startups e iniciativas tecnolóxicas.
Durante o acto tamén se puxo en valor o momento de expansión que vive a industria aeroespacial en Galicia. O director xeral adxunto de Sistemas Espaciais de GMV, Miguel Ángel Molina, referiuse ao recente lanzamento do satélite Celeste como exemplo do avance tecnolóxico do sector e da relevancia que está a adquirir no ámbito europeo.
Pola súa banda, o coordinador do grupo de Tecnoloxía Aeroespacial da Universidade de Vigo, Fernando Aguado, subliñou a transformación experimentada pola comunidade nos últimos anos, destacando que Galicia pasou de exportar talento enxeñeiro a atraer profesionais cualificados grazas ao desenvolvemento deste ecosistema industrial.
Desde a Xunta de Galicia reivindicouse tamén a aposta institucional realizada durante a última década para impulsar un sector que practicamente non existía no territorio. A directora xeral de Estratexia Industrial e Solo Empresarial, Margarita Ardao, destacou a colaboración entre administracións, universidades e empresas como un dos factores clave do crecemento aeroespacial galego.
No marco da presentación, o delegado do Estado na Zona Franca de Vigo, David Regades, avanzou ademais a próxima instalación dunha nova empresa catalá especializada na fabricación de ópticas para satélites no parque empresarial de Porto do Molle, en Nigrán. Segundo indicou, esta incorporación reforza o papel de Galicia como foco de atracción para compañías tecnolóxicas vinculadas ao sector espacial e consolida o “hub” industrial que se está a desenvolver na área viguesa.