Vigo organizará un concerto solidario para apoiar ás vítimas dos terremotos en Venezuela
O Concello de Vigo promoverá un concerto solidario coa finalidade de recadar fondos para axudar ás persoas afectadas polos recentes terremotos rexistrados en Venezuela. Así o anunciou este luns o alcalde, Abel Caballero, durante un encontro co cónsul xeral da República Bolivariana de Venezuela, Martín Pacheco Morillo.
Segundo explicou o rexedor, a recadación obtida no evento destinarase a cubrir as principais necesidades das vítimas da catástrofe, especialmente no relativo á adquisición de alimentos, auga potable e medicamentos. Caballero sinalou que o concerto se celebrará “canto antes” e definiuno como unha mostra da solidariedade e da proximidade da cidadanía viguesa co pobo venezolano nun momento especialmente difícil.
Antes de asinar no libro de condolencias habilitado no consulado venezolano, o alcalde mantivo tamén unha reunión con representantes da Asociación de Venezolanos en Galicia de Pontevedra (Asovedra), entre eles Andrea Gómez e Manuel Osorio.
Durante o encontro, os responsables da entidade trasladaron ao Concello a necesidade de obter recursos económicos para financiar a compra de produtos básicos destinados á atención das persoas damnificadas tanto en Venezuela como nos países limítrofes que están a colaborar na resposta á emerxencia.
A iniciativa impulsada polo Goberno municipal busca mobilizar á sociedade viguesa nun acto solidario que combine a música coa colaboración cidadá para contribuír a paliar as consecuencias humanas provocadas polos terremotos.