Vigo restaura os históricos canóns da fortaleza do Castro
O alcalde de Vigo visitou os traballos de restauración dos canóns históricos da fortaleza do Castro, unha actuación na que o Concello investiu arredor de 33.000 euros e que forma parte do proceso de recuperación integral deste espazo patrimonial.
A intervención centrouse especialmente nas cureñas, as estruturas de madeira que serven de soporte ás pezas de artillería e que se atopaban deterioradas polo paso do tempo. O rexedor felicitou aos técnicos responsables por un traballo que cualificou de “excepcional”.
Caballero enmarcou a actuación nas sucesivas intervencións realizadas polo Concello no Castro. “Primeiro restauramos a propia muralla, despois recuperamos a parte central e o polvorín, reparamos toda a entrada norte e agora estamos cos elementos que lle dan carácter á propia fortaleza”, explicou. A recuperación dos canóns permitirá reforzar a ornamentación e o carácter histórico da porta de acceso.
O alcalde referiuse tamén á historia destas pezas, adquiridas durante o reinado de Fernando VII en 1817-1818 a Rusia, baixo o réxime do Zar Alejandro I, e sinalou que nunca chegaron a dispararse. “O certo é que son impresionantes. Calquera exército que vexa estes canóns xa non ataca”, ironizou.
Entre as actuacións realizadas nos últimos anos, Caballero destacou especialmente a retirada do antigo restaurante situado xunto á muralla, que permitiu descubrir e recuperar unha parte da fortificación que permanecía oculta. O Concello acometeu tamén a rehabilitación dos túneles, da zona central e do polvorín.
O seguinte obxectivo municipal será retirar a cafetería situada actualmente na entrada da fortaleza para deixar completamente á vista a muralla. Caballero explicou que a concesión remata o 27 de xuño de 2029. A intención é manter o servizo de hostalería, pero trasladándoo a unha zona inferior. “Aquí ten que haber unha cafetería, pero farémola máis abaixo”, avanzou.