O PP de Sarria denuncia a “desidia” do alcalde do municipio e do conxunto do goberno local ante o “abandono” que presenta a praza da Pontevella.
Os populares fanse eco das reclamacións dos veciños e veciñas da zona, que se queixan de que o pavimento das sendas peonís que hai na praza ten numerosas lousas rotas e levantadas. Ademais, a pavimentación das mesmas anégase a miúdo, resultando “perigosa” para nenos e maiores, e moitas das bocas da rede de sumidoiros están afundidas.
A praza da contorna da urbanización Pontevella está dotada dunha fonte pública que, din, “está avariada e sen funcionar dende fai moito tempo”, e tamén dunha zona de xogos infantís “co peche perimetral roto”.
Dende o grupo municipal do PP engaden ademais que o espazo presenta un importante problema de alumeado público, debido a que “mais da metade” das farolas non funcionan. Aínda así, denuncian, a empresa adxudicataria do servizo “segue a cobrar o multimillonario contrato privatizador todos os meses”.
Praza da Pontevella
