Un total de 57 establecementos de hostalería da Mariña benefícianse do programa de axudas para o acondicionamento de terrazas e a compra de elementos de envasado para domicilio.
As axudas suman un importe global de 555.000 euros, e supoñen o 80% do orzamento mobilizado polos hostaleiros (693.600 euros).
A maior parte do investimento realizado destinouse á instalación de peches estables ou desmontables así como outros elementos móbiles tales como toldos, biombos, cortaventos, parasoles e tarimas accesibles. En concreto, mobilizáronse para este fin 427.100 euros.
Outros 176.200 euros investíronse na adecuación estética e funcional das terrazas, mediante a renovación do mobiliario, instalación de sistemas de iluminación e de aparatos calefactores exteriores, así como actuacións de mellora da fachada exterior do local.
Por último, 90.300 euros foron destinados á adquisición de elementos sostibles de envasado e empaquetado de comida e bebidas para o servizo de entrega a domicilio ou de recollida no propio local.
