Na última xunta celebrada por parte do goberno local de Sarria este autorizou o pago de dúas reclamacións de responsabilidade patrimonial por unha contía económica de 73.780 euros.
O gasto máis grande irá destinado á indemnización que deberá asumir o Concello da fábrica de As Insuas. E os outros 16.127 euros restantes veñen a causa dunha licenza que non se concedeu hai once anos para restaurar un inmoble situado no bulevar de Calvo Sotelo.
En ambos expedientes, a xustiza fallou a favor dos demandantes. Por tanto, O Concello terá que aportar agora as pertinentes indemnizacións.No tocante ao primeiro caso de As Insuas, este recibirá esta por “dano emerxente e o lucro cesante”.
A segunda reclamación aconteceu no 2011 cando se pediu licenza de obra ao Concello para restaurar un inmoble no bulevar da rúa Calvo Sotelo. A empresaria que o pediu tiña intención de pasar o seu negocio a este punto. Ao ser esta demanda desestimada pola administración, a muller presentou un recurso no xulgado Contencioso-administrativo, o cal fallou dándolle a razón. O Concello recorreu dita sentenza, mais o TSXG ratificou o fallo.
Malia todo, pese a que agora a Xunta de Goberno aprobou eses 16.126,93 euros de idemnización, os afectados reclamaban que lles chegasen maiores contías.
