O arqueiro pontés, Miguel Alvariño, vén de ser nominado entre os cinco mellores seteiros da pasada tempada na modalidade de arco recurvo nos World Archery Award.
Compiten xunto a el por esta distinción Kim Woojin, de Corea; Florian Unruh, de Alemaña; Marcus D`Almeida, de Brasil e Mete Gazoz, de Turquía. Todos eles seteiros da elite mundial deste deporte.
Os afeccionados poden votar polos seus seteiros favoritos en seis das 10 categorías ata finais de febreiro de 2023 a través do minisitio WorldArcheryAwards.com.
Os nominados para os nove premios recibíronse de federacións nacionais e membros da prensa.
A tempada realizada por Miguel Alvariño foi espectacular, tanto polos seus triunfos a nivel europeo como nas probas de carácter mundial. A máis destacada foi entrar na fase final da Copa do Mundo, á que só acudiron os mellores dos mellores, e na que caeu fronte ao seteiro coreano obtendo o subcampionato. Ademais, recoñecen as outras cinco medallas obtidas, 3 de ouro, 4 de prata e 4 de bronce en distintas fases da Copa do Mundo e o ouro e a prata na fase final; así como o seu paso polo xogos olímpicos.
